Revelasion 16 - Nouvo Testaman Kreol Morisien Harmonisation NTPS KM

Set koup lakoler Bondie

¹ Apre sa, mo tann enn lavwa for sorti dan Tanp e ti pe dir sa set anz-la, “Al vers set koup lakoler Bondie lor later.”

² Premie anz ale e li vers so koup lor later. Lerla enn ilser malsin tom lor bann dimounn ki ti ena mark bebet ek ki ti ador so zimaz.

³ Deziem anz ti vers so koup dan lamer e li ti vinn kouma disan dimounn mor e tou seki vivan dan lamer ti mor.

⁴ Trwaziem anz ti vers so koup dan bann larivier ek lasours e zot ti vinn disan.

⁵ Alor mo tann anz ki ena lotorite lor dilo la dir, “Twa ki exis, e ki ti existe, twa ki zis, twa ki sin, To finn touletan azir ar lazistis.

⁶ Parski zot finn vers disan lepep Bondie ek profet, to finn donn zot disan pou bwar. Samem ki zot merite!”

⁷ Apre sa, mo tann enn lavwa sorti kot lotel ki dir, “Wi, Segner Bondie Toupwisan, to bann zizman, zot vre ek zis.”

⁸ Katriem anz vers so koup lor soley, e soley gagn permision pou bril dimounn par so saler dife.

⁹ Dimounn ti pe brile par enn saler terib. Zot ti modi nom Bondie ki ena lotorite lor sa bann fleo-la, e zot pa ti sanz zot konportman pou glorifie Bondie.

¹⁰ Sinkiem anz ti vers so koup lor tronn bebet-la, e marenwar ti anvayi so rwayom. Dan zot lagoni dimounn ti mord-mord zot lalang,

¹¹ e akoz zot douler ek bann ple, zot ti modi Bondie lesiel. Me zot pa ti aret zot move aksion.

¹² Siziem anz ti vers so koup lor sa gran larivier ki apel Lefrat la e larivier-la ti sek pou prepar pasaz bann lerwa ki sorti kot soley leve.

¹³ Lerla mo trouv trwa move lespri koumadir krapo sorti dan lagel dragon, dan lagel bebet-la e dan labous fos profet.

¹⁴ Sa ti bann lespri demon ki fer bann mirak. Zot al rod bann lerwa lemond antie, pou rasanble zot pou lager kan gran zour Bondie Toupwisan arive.

¹⁵ Rapel seki Kris ti dir, “Ala, mo pe vini parey enn voler! Ere sa dimounn ki res eveye, so linz pare pou li mete, pou ki li pa mars touni, e gagn onte.”

¹⁶ Zot rasanble zot dan enn landrwa ki apel Armagedon.

¹⁷ Setiem anz vid so koup dan lezer e enn lavwa for sorti kot tronn ki dan Tanp. Li dir, “Tou finn fini!”

¹⁸ Alor ti ena zekler, tapaz lavwa, loraz e enn gran tranbleman-de-ter telman violan ki zame sa pa finn arive depi kreasion bann imin lor later.

¹⁹ Sa gran lavil-la ti divize an-trwa e bann lavil dan tou pei ti tom an-rwinn. Bondie ti rapel Gran Babilonn e ti donn li bwar koup divin so lakoler.

²⁰ Tou bann zil ti disparet e bann montagn ti fonn.

²¹ Boul lagrel ki pez ziska san liv ti tom lor bann dimounn depi lesiel. Bann dimounn ti insilte Bondie akoz sa fleo lagrel-la ti vremem redoutab.