Revelasion 13 - Nouvo Testaman Kreol Morisien Harmonisation NTPS KM

Vizion de bebet

¹ Lerla mo trouv enn bebet sorti dan lamer, li ena dis korn ek set latet; lor sak korn ti ena enn kouronn e lor bann latet-la ena enn bann nom ki insilte Bondie.

² Bebet-la ti resanble enn leopar, so lapat kouma lapat lours, e so lagel kouma lagel lion. Dragon ti donn li so pwisans ek so tronn avek enn gran lotorite.

³ Enn so latet ti paret ena enn blesir mortel, me so ple ti geri. Later antie ti emerveye e ti swiv bebet-la.

⁴ Zot ti ador dragon ki ti finn donn so lotorite sa bebet-la, e zot ti ador bebet-la e zot ti dir, “Kisann-la parey kouma sa bebet-la, e kapav lager kont li?”

⁵ Bebet-la ti gagn lotorizasion servi labous ki pronons bann blasfem ek parol arogan. Li ti finn gagn pouvwar pou azir pandan karann-de mwa.

⁶ Li ti ouver so lagel pou dir bann parol blasfem kont Bondie. Li ti insilte nom Bondie, so Tanp ek tou bann abitan lesiel.

⁷ Li ti osi ena drwa fer lager ar lepep Bondie e gagn laviktwar lor zot. Li ti osi ena lotorite lor tou tribi, pep, langaz ek nasion.

⁸ Tou bann abitan later pou ador li, bann abitan ki zot nom pa finn inskrir depi avan kreasion lemond dan liv lavi ki pou Agno ki finn sakrifie.

⁹ Seki ena zorey pou tande, ekout bien.

¹⁰ Si kikenn finn fer pou vinn prizonie, li pou al dan prizon; si kikenn finn fer pou mor avek lepe, li pou mor avek lepe. Ala enn lapel pou landirans ek lafwa pou lepep Bondie.

¹¹ Apre sa, mo trouv enn lot bebet ki sorti dan later; li ti ena de korn parey kouma enn agno e li ti koz parey kouma enn dragon.

¹² Li ti exers tou pouvwar sa premie bebet-la dan so prezans. Li ti fors later ek tou so bann abitan ador sa premie bebet ki so blesir ti finn geri la.

¹³ Sa deziem bebet-la ti finn realiz gran-gran mirak; li ti mem fer dife sorti dan lesiel tom lor later devan tou dimounn.

¹⁴ Li ti sedwir bann abitan later par pouvwar ki ti finn donn li pou fer mirak devan lot bebet-la. Li ti dimann bann abitan fer enn zimaz sa bebet ki ti finn blese ar lepe la, e ki ti ankor pe viv.

¹⁵ Li ti gagn drwa pou anim zimaz bebet-la ziska fer li koze e fer li kapav touy tou bann ki pa ti ador li.

¹⁶ Li ti obliz tou dimounn, ki li tipti ou gran, ris ou pov, lib ou esklav, pou resevwar enn mark, swa lor zot lame drwat swa lor zot fron.

¹⁷ E personn pa ti kapav aste ou vande si li pa ti ena sa mark-la, nom bebet-la ou nimero so nom.

¹⁸ La, bizin ena lasazes pou konpran nimero bebet-la, parski sif-la koresponn avek nom enn zom. Sis san swasann-sis.