Revelasion 12 - Nouvo Testaman Kreol Morisien Harmonisation NTPS KM

Vizion enn fam ek enn dragon

¹ Enn gran sign paret dan lesiel: enn fam ki ti abiye avek soley, lalinn anba so lipie, e lor so latet enn kouronn douz zetwal.

² Li ti ansint e pre pou akouse; dan so soufrans lakousman, li ti pe kriye.

³ Lerla enn lot sign paret dan lesiel: enn gran dragon rouz, avek set latet ek dis korn, e set kouronn lor so bann latet.

⁴ So lake ti balie enn tier bann zetwal dan lesiel e ti zet zot lor later. Lerla dragon-la dibout devan fam ki ti pe al akouse la, pou ki li kapav devor tibaba-la kouma li ne.

⁵ Fam-la ti akous enn garson, enn ti-garson ki pou diriz bann nasion avek enn baton lasie. Me enn lafors ti pran zanfan-la, amenn li kot Bondie e kot so tronn.

⁶ Fam-la ti sove al dan dezer kot Bondie ti prepar manze ek bwar pou li pandan mil de-san swasant zour.

⁷ Alor, enn lager ti eklate dan lesiel; Misel ek so bann anz ti konbat kont dragon-la. Dragon-la ek so bann anz ti lite zot osi,

⁸ me zot ti perdi lager, e pa ti ena plas pou zot ankor dan lesiel.

⁹ Sa gro dragon-la ti perdi so plas. Sa vie serpan ki zot ti apel diab, ou Satan, sedikter lemond la, li avek so bann anz ti perdi zot plas dan lesiel.

¹⁰ Lerla mo tann enn lavwa for dan lesiel ki dir, “Aster-la moman delivrans, pwisans regn Bondie, ek lotorite so Mesi finn arive. Akizater nou bann frer ek ser finn perdi plas, li ti pe akiz zot lanwit-lizour.

¹¹ Me zot, zot finn gagn batay par disan Agno Bondie e par parol zot temwaniaz, parski zot pa ti telman atase ar zot lavi pou zot refiz lamor.

¹² Alor lesiel bizin dan lazwa, ansam ek tou so bann abitan. Me maler pou later ek lamer, parski diab finn desann kot zot. Li bien-bien ankoler, parski li kone ki letan kourt!”

Dragon lager kont later

¹³ Letan dragon-la konpran ki li ti finn tom lor later, li ti al lasas sa fam ki ti donn nesans enn ti-garson la.

¹⁴ Me fam-la ti resevwar de lezel gran leg, e li ti kapav anvol dan dezer, lwin ar serpan, dan enn landrwa kot li ti pou gagn so manze-bwar pou trwa-z-an edmi.

¹⁵ Alor serpan-la ti vomi koumadir enn larivier dilo deryer fam-la pou nway li.

¹⁶ Me later ti sekour fam-la; li ti ouver so labous e aval tou dilo ki dragon-la ti vomi.

¹⁷ Lerla dragon-la ti ankoler kont fam-la, e li ti al deklar lager avek leres so desandan, bann ki res fidel ar komannman Bondie ek ki res bann disip Zezi.

¹⁸ Apre sa dragon-la ti al dan bor lamer.