Revelasion 11 - Nouvo Testaman Kreol Morisien Harmonisation NTPS KM

De temwin

¹ Apre sa, ti donn mwa enn baton ki servi pou mizire e ti dimann mwa, “Al mizir Tanp Bondie e so lotel. Kont osi bann ki pe ador Bondie laba.

² Me pa bizin mizir lakour andeor Tanp; kit sa parti-la parski finn donn li bann nasion ki pou kraz sa lavil sin-la pandan karann-de-z-an.

³ E mo pou otoriz mo de temwin abiye dan linz dey, pou profetize pandan mil de-san swasant zour.”

⁴ Zotmem sa de pie zoliv ek sa de lanpader ki ti devan Lesegner later la.

⁵ Si kikenn anvi fer zot ditor, dife pou sorti dan zot labous e devor zot lennmi; koumsa mem tou seki anvi fer zot ditor pou mor.

⁶ Zot ena lotorite pou ferm lesiel, pou anpes lapli tonbe osi lontan ki zot pe transmet mesaz Bondie; zot ena lotorite pou sanz dilo, fer li vinn disan, e pou atak later avek toutsort kalite fleo, kan e ler zot anvi.

⁷ Me kan zot fini zot temwaniaz, bebet ki sorti dan pwi-san-fon pou atak zot ek touy zot.

⁸ Zot lekor mor pou res lor laplas santral sa gran lavil ki sinbolikman apel Sodom ek Lezip, akot ti krisifie zot Segner.

⁹ Dimounn sorti dan boukou pei, kot boukou nasion, tribi ek langaz pou get sa bann lekor mor la pandan trwa zour edmi e pou refiz met zot dan tom.

¹⁰ Tou dimounn lor later pou kontan, zot pou selebre e zot pou avoy zot kamarad kado, akoz lamor sa de profet ki ti finn tourmant zot la.

¹¹ Me apre sa trwa zour edmi-la,

¹² sa de profet-la tann enn lavwa for sorti dan lesiel: “Mont isi!” Zot mont dan lesiel dan enn niaz letan ki zot lennmi obzerv zot ale.

¹³ Anmemtan ti ena enn gran tranbleman-de-ter, e enn diziem lavil ti kraze net; set mil dimounn ti mor dan tranbleman-de-ter-la. Bann sirvivan ti terifie e zot ti pe glorifie Bondie lesiel.

¹⁴ Deziem maler ti finn pase, me fer atansion! Trwaziem maler pe vini biento.

Setiem tronpet

¹⁵ Lerla setiem anz soufle so tronpet, e ti ena bann lavwa bien for dan lesiel ki ti dir, “Aster-la rwayom lemond finn rant anba pouvwar Bondie nou Segner ek so Mesi. Li pou regne pou touzour.”

¹⁶ Lerla sa vennkat ansien ki ti lor zot tronn devan Bondie la, tom ater devan li, figir kont later e zot ador li.

¹⁷ Zot dir, “Nou rann twa gras Segner Bondie pli pwisan ki tou, twa ki existe e ki ti existe, parski to finn servi to gran pouvwar e koumans regne.

¹⁸ Bann nasion ti araze, me aster-la to lakoler ki pe manifeste, enn moman zizman pou bann mor, enn moman rekonpans pou bann profet ki servi twa, pep ki konsakre pou twa, e tou bann ki respekte to nom, so gran kouma so tipti, e pou detrir bann ki detrir later.”

¹⁹ Tanp Bondie dan lesiel ti ouver e kof lalians paret; lerla zekler eklate, loraz fer tapaz e ti ena tranbleman-de-ter ek gro-gro lagrel.