Revelasion 1 - Nouvo Testaman Kreol Morisien Harmonisation NTPS KM

Introdiksion

¹ Revelasion Zezi Kris, ki Bondie finn done pou montre so bann serviter seki pou arive biento. Pou fer konn so mesaz, li finn avoy so anz kot so serviter Zan.

² Zan pou temwagn lor tou seki li finn trouve konsernan parol Bondie ek temwaniaz Zezi Kris.

³ Bienere dimounn ki lir, e bienere bann ki tann parol profesi, e ki gard seki finn ekrir isi; parski letan ki finn fixe pou sa bann kitsoz-la pre pou arive.

⁴ Ala mesaz ki Zan pe avoy set Legliz dan provins Lazi: Lagras ek lape Bondie ki existe, ki ti existe e ki pou vini; mesaz sorti osi kot sa set lespri devan tronn,

⁵ e kot Zezi Kris, temwin fidel, premie-ne parmi bann mor e dirizan bann lerwa lor later. Zezi Kris kontan nou, par so lamor li finn tir nou dan nou pese.

⁶ Li finn fer nou vinn enn rwayom pret pou servi Bondie Papa. Laglwar ek pwisans pou Zezi Kris pou touzour. Amen.

⁷ Gete, li pe vini dan niaz! Tou dimounn pou trouv li, mem bann ki ti transpers li. Tou bann pep lor later pou rakonte. Wi koumsa mem sa pou ete. Amen.

⁸ “Mo mem Alfa ek Omega,” deklar Lesegner Bondie ki existe, ki ti existe e ki pou vini.

Zan gagn enn vizion

⁹ Mwa, zot frer Zan, ansam ar Zezi mo partaz zot soufrans e rwayote, pasians ek landirans. Mo retrouv mwa lor lil Patmos akoz parol Bondie ek temwaniaz Zezi.

¹⁰ Zour Lesegner, Lespri Sin finn sezi mwa e mo finn tann enn lavwa for deryer mwa ki rezone kouma enn tronpet;

¹¹ Li ti pe dir, “Ekrir dan enn liv seki to pe trouve e avoy liv-la kot sa set Legliz dan Efez, Smirn, Pergam, Tiatir, Sard, Filadelfi ek Laodise.”

¹² Mo retourne pou gete kisann-la pe koz ar mwa. Lerla mo trouv set sandelie dore.

¹³ Omilie zot ti ena enn kreatir resanble enn zom ki ti finn met enn long rob ziska so lipie ek enn sang an-or dan so lerin.

¹⁴ So latet ek so seve ti blan parey kouma lalenn blan, parey kouma lanez e so lizie parey kouma enn boul dife;

¹⁵ so lipie ti pe briye parey kouma bronz bien poli dan four e so lavwa ti rezone parey kouma son dilo kaskad.

¹⁶ Li ti pe tini set zetwal dan so lame drwat, e enn lepe ki koup de kote e ki bien fite ti sorti dan so labous. So figir ti briye parey kouma soley midi.

¹⁷ Ler mo trouv li, mo tonbe kouma enn dimounn mor e mo prostern devan li parey. Me li ti poz so lame drwat lor mwa e li ti dir, “Pa per twa! Momem premie ek dernie,

¹⁸ momem lasours lavi, mo ti finn mor, aster-la gete, mo vivan pou leternite; e mo ena pouvwar lor lamor e mo posed lakle laport Ades.

¹⁹ Aster-la ekrir seki to finn trouve, seki pe pase aster-la e seki pou arive apre.

²⁰ Ala sinifikasion mister sa set zetwal ek set sandelie an-or ki zot ti trouve dan mo lame drwat. Sa set zetwal-la reprezant bann anz, e sa set lalanp-la reprezant set Legliz.”