Psom 99 - Nouvo Testaman Kreol Morisien Harmonisation NTPS KM

Lesegner Bondie, Lerwa Siprem

¹ LESEGNER, limem lerwa; lepep partou tranble. Li asiz lor so tronn pli lao ki bann seribin; e liniver antie emerveye.

² LESEGNER li gran dan Sion; li lao tou bann pep.

³ Tou dimounn selebre to nom ki gran e formidab. Lesegner li sin!

⁴ O Lerwa Toupwisan, to kontan seki drwat; to finn etabli lord, drwa e zistis dan Izrael.

⁵ Anou exalte LESEGNER nou Bondie; anou azenou devan so marspie pou ador li. Vremem li sin!

⁶ Moiz ek Aaron ti parmi so bann pret, e Samiel ti parmi bann ki ti priye li. Zot ti dimann sekour LESEGNER e li ti reponn.

⁷ Depi niaz ki ti drese kouma enn kolonn, li ti koz ar zot; zot ti ekout so konsey ek instriksion.

⁸ O SEGNER nou Bondie, to ti ekout lapriyer to pep. To ti enn Bondie ki pardone, mem si to donn pinision ler zot fer fot.

⁹ Anou exalte LESEGNER nou Bondie; e ador li lor so montagn sakre. LESEGNER nou Bondie, li sin.