Psom 97 - Nouvo Testaman Kreol Morisien Harmonisation NTPS KM

Bondie Lerwa Siprem

¹ LESEGNER, limem lerwa! Later dans ar lazwa! Tou bann lil atraver losean, montre zot kontantman!

² Niaz ek marenwar epe anvlop li; so regn gouverne par drwatir ek lazistis.

³ Enn laflam mars divan li, e bril bann lennmi otour li.

⁴ Zekler ekler lemond e kan later trouv sa, li tranble.

⁵ Montagn fonn kouma lasir dan prezans LESEGNER, devan Lesegner, lerwa liniver.

⁶ Lesiel anons so drwatir e tou bann pep trouv so laglwar.

⁷ Bann ki ador idol gagn onte; bann ki fer vantar ar zot idol initil; tou bann divinite, prostern zot devan li.

⁸ Lepep Sion tann sa e li dan lazwa e bann lavil dan Zide pe selebre akoz to zizman, O Bondie.

⁹ SEGNER, tomem ki Pli Lao lor later antie; tomem pli eleve ki tou bann ti-bondie.

¹⁰ LESEGNER kontan bann ki deteste lemal; li protez lavi so bann fidel; li aras zot dan lame bann ki pratik lemal.

¹¹ Lalimier ekler lavi dimounn drwat; lazwa aroz bann leker drwat.

¹² Zot tou ki viv drwat, montre zot lazwa dan LESEGNER. Glorifie so nom ki sin.