Psom 96 - Nouvo Testaman Kreol Morisien Harmonisation NTPS KM

Lesegner, limem Lerwa Siprem

¹ Anou sant enn nouvo sante pou LESEGNER! Tou kreatir dan liniver, sant laglwar LESEGNER!

² Nou sant pou LESEGNER; anou sant so louanz. Toulezour nou anonse ki limem nou Sover.

³ Anou anons so laglwar ar tou bann nasion; anons so bann explwa ar tou bann pep.

⁴ LESEGNER li bien gran, li merit ki nou louanz aklam li. Li pli for e pli redoutab ki tou lezot ti-bondie.

⁵ Bann bondie ki lezot pep venere zot zis bann idol me LESEGNER limem kreater liniver.

⁶ Li antoure ar laglwar ek mazeste; pouvwar ek bote ranpli so Tanp.

⁷ Donn LESEGNER, zot tou bann pep lor later; donn LESEGNER so laglwar ek so pouvwar.

⁸ Donn LESEGNER laglwar ki so nom merite; amenn zot ofrand e rant dan so Tanp.

⁹ Ador LESEGNER ki sin, ler li paret dan so mazeste; liniver ki li finn kree, tranble devan li.

¹⁰ Dir tou bann tribi, “LESEGNER limem lerwa. Lemond finn etabli bien ferm, pena li bouze. Li pou ziz tou dimounn ar drwatir.”

¹¹ Lesiel montre to lazwa! Later exprim to boner! Ki lamer gronde, avek tou seki viv ladan;

¹² bann karo ek tou seki pouse ladan, les zot boner exploze. Bann pie dan lafore pou sante ar lazwa

¹³ zot pou sant devan LESEGNER akoz li pe vini, li vini pou regn lor later. Li pou regn lor lemond avek lazistis lor bann pep selon laverite.