Psom 92 - Nouvo Testaman Kreol Morisien Harmonisation NTPS KM

Anou sant louanz Bondie

Enn Psom. Enn sante pou zour Saba.

¹ Li vremem bon dir LESEGNER mersi, pou sant louanz pou to nom, Bondie Pli Lao;

² ler toule gramatin mo proklam to lamour infini; mo deklar to fidelite touleswar,

³ akonpagne par lamizik mandolinn ek sitar, ar melodi lagitar.

⁴ Twa SEGNER, to ranpli mo leker ar to bann gran explwa. Akoz tou seki to finn fer, mo sante avek lazwa dan leker.

⁵ SEGNER, to bann explwa zot extra gran; to lespri li extra profon.

⁶ Sa, enn dimounn bet pa kapav sezi, ti-lespri zame pou konpran sa:

⁷ bann ki viv dan pese zot pouse kouma move lerb; bann ki finn swazir move sime zot kapav prospere me enn zour zot pou fini net.

⁸ Me twa, SEGNER, tomem pli gran pou touzour.

⁹ Nou kone ki to bann lennmi, SEGNER, to bann lennmi pou mor, e bann dimounn ki pratik lemal pou disperse.

¹⁰ To finn donn mwa lafors enn elefan; To finn kouronn mwa ar delwil parfime.

¹¹ Mo finn trouv defet mo bann lennmi; mo finn tann bann agreser plengne ar douler.

¹² Dimounn ki obeir pou prospere kouma palmie; zot pou grandi kouma pie lafours.

¹³ Zot pou kouma bann pie dan verze LESEGNER ki raport zoli fri dan lakour Tanp nou Bondie,

¹⁴ ki kontign port fri dan zot vieyes e ki touletan ver ek for.

¹⁵ Tousala montre ki pena linzistis dan LESEGNER, “li mo ranpar e dan li pena linzistis.”