Psom 90 - Nouvo Testaman Kreol Morisien Harmonisation NTPS KM

KATRIYEM LIV PSOM ( Psom 90—106 ) Bondie ek limanite

Lapriyer Moiz, zom swazire par Bondie.

¹ Segner, se twa ki finn touletan donn nou sekirite.

² Avan kreasion montagn, avan ki to ti fasonn later ek lemond, depi touzour e pou touzour twa ki Bondie.

³ To fer dimounn retourn lapousier, to dir, “Imin, retourn kot to sorti!”

⁴ Mil an pou twa li pa pli long ki enn zour ki finn fonn; oubien parey de-trwa ler-tan dan lanwit.

⁵ To balie tousala, parey enn rev ki pase, parey kouma lerb ki ne gramatin,

⁶ li fleri gramatin, grandi pandan lazourne e deperi ek mor aswar.

⁷ To lakoler griye nou; To laraz terifie nou.

⁸ To plas nou bann fot devan twa, dan lalimier to prezans okenn sekre pa sape.

⁹ To lakoler koup-koup longer nou lavi ki tengn kouma enn soupir.

¹⁰ Nou kapav viv swasanndis-an, katrovin si lasante bon, me se traka ek sagrin ki plin nou lexistans; bann lane pas vit e nou anvole ale.

¹¹ Kisann-la finn fer fas lafors to lakoler? To lakoler osi gran ki nou respe pou twa.

¹² Fer nou konpran kouma lavi kourt; sa kapav ranpli nou leker ar sazes.

¹³ Eski to pou kontinie ankoler ar nou? Pitie nou, SEGNER, montre konpasion.

¹⁴ Toule gramatin ranpli nou ar to lamour infini; koumsa nou pou kapav sante e konn lazwa toulezour.

¹⁵ Zordi, Segner, donn nou aster otan lazwa ki sagrin ki nou ti kone yer dan moman douler ek penitans.

¹⁶ Permet nou dekouver to bann gran aksion; permet nou desandan trouv to pwisans triyonfan.

¹⁷ O Segner nou Bondie, devers to benediksion lor nou, beni travay nou lame avek prosperite, wi, beni travay nou lame avek prosperite!