Psom 9 - Nouvo Testaman Kreol Morisien Harmonisation NTPS KM

Mersi Segner Bondie pou to bonte

Pou sef koral, dapre Mout-Labenn. Enn Psom David.

¹ Mo pou loue to grander, SEGNER, ar tou mo leker; mo pou rakont tou mervey ki to finn fer.

² Akoz twa mo pou dan lazwa. Mo pou sant to gran nom, Bondie Pli Lao.

³ Mo lennmi kapitile ek rekile; zot tom sek, zot mor divan twa.

⁴ To finn defann mo drwa, finn fer zistis pou mwa; depi to tronn to donn zizman ki drwat.

⁵ To finn kraz bann nasion infidel; e to finn detrir bann move dimounn, zot nom finn efase pou touletan.

⁶ Nou lennmi nepli existe; to finn plati zot lavil e personn pa pou rapel zot.

⁷ Me LESEGNER pou regne pou touletan; depi so tronn bien ferm li pou pronons zizman.

⁸ E li ziz lemond antie dapre drwatir; e li garanti lazistis pou tou bann pep.

⁹ LESEGNER protez bann ki pe soufer dominasion; li donn sekirite kan maler pe tape.

¹⁰ Bann ki konn to nom, SEGNER, met tou zot konfians an twa parski zame to abandonn seki rod to sekour.

¹¹ Anou sant louanz pou LESEGNER ki regne depi Zerizalem. Anou rakont so bann mervey parmi bann pep!

¹² Bondie ki galoup deryer bann asasin, li rapel zot viktim; li pa bliye lavwa ki exprim soufrans bann malere.

¹³ SEGNER, ena pitie! Gete kouma mo soufer akoz mesanste mo lennmi! Twa ki tir mwa dan latrap lamor, SEGNER,

¹⁴ e ki permet mwa dibout divan lepep Zerizalem pou rakont zot kifer mo sant to louanz. Mo lazwa li gran parski to finn sov mwa.

¹⁵ Bann nasion finn tom dan trou ki zot finn fouye zotmem; zot finn dres enn latrap e zotmem ki finn rant ladan.

¹⁶ LESEGNER finn revel limem par zizman ki li finn fer; e move dimounn finn tas dan zot prop piez.

¹⁷ Bann move dimounn e bann nasion ki bliye Bondie zot tou finn fini dan lemond bann mor.

¹⁸ Bann ki dan bezwin pa pou touletan pas mizer; e bann ki soufer povrete, zot lespwar pa pou tom dan dilo.

¹⁹ Lev twa, SEGNER! Pa les personn gagn laviktwar! Fer amenn bann nasion infidel divan to tronn e donn to zizman kont zot.

²⁰ Fer zot per e respe twa, SEGNER; Fer zot tou bien konpran ki zot zis bann imin.