Psom 88 - Nouvo Testaman Kreol Morisien Harmonisation NTPS KM

Osekour, Segner Bondie!

Enn sante. Instriksion Emann. Enn Psom ki sorti dan fraternite Kore. Pou sef koral, zwe dan enn fason melankolik.

¹ SEGNER Bondie, mo Sover, tout lazourne mo kriy osekour; tou lanwit mo priye twa.

² Ekout mo lapriyer ki devan twa, tann mwa kriye osekour.

³ Traka pe ranpli mo lavi; lamor pe koste kot mwa.

⁴ Mo lor lalis bann ki ena enn lipie dan tom, mo parey enn dimounn ki nepli ena lafors.

⁵ Mo koumadir kikenn ki finn abandone dan rwayom lamor; mo kouma bann solda mor ki finn zet dan fose, kouma kikenn ki to finn bliye net, ki to finn koupe net ar zot.

⁶ To finn rezet mwa dan fon trou lamor, dan finfon marenwar.

⁷ To lakoler pez lour lor mwa, kouma gro-gro vag li kraz mwa.

⁸ To finn fer mo bann kamwad abandonn mwa; aster zot get mwa ar degou. Miray otour mwa, mo pena sime sorti;

⁹ soufrans ek larm finn febli mo lizie. SEGNER, toulezour mo sipliy twa; mo lev lame ver twa pou dimann led.

¹⁰ Eski to fer mirak pou dimounn mor? Eski dimounn mor leve pou sant to louanz?

¹¹ Eski dan tom, kadav koz lor to lamour infini? Eski dan landrwa destriksion, lamor koz lor to fidelite?

¹² Eski dan nik marenwar to mirak vizib? Eski dan lemond san memwar to bonte reyone?

¹³ SEGNER, mo pe dimann twa ed mwa; toule gramatin mo sipliy twa.

¹⁴ Kifer to bous to zorey? Kifer to get lot kote?

¹⁵ Depi mo zanfan mo pe soufer; souvan mo pas pre ar lamor; mo finn sibir terer ki to inpoze, mo dan dezespwar.

¹⁶ Dife to lakoler kraz mwa; to violans fini mwa.

¹⁷ Tout lazourne zot bar mwa partou kouma debordman; lor tou kote zot fons lor mwa san pitie.

¹⁸ Mo bann meyer kamwad finn fini abandonn mwa; zis marenwar epe ki koste ar mwa.