Psom 86 - Nouvo Testaman Kreol Morisien Harmonisation NTPS KM

Segner Bondie, sov mwa!

Lapriyer David.

¹ SEGNER, ekout mwa e exos mo lapriyer. Mo pov, mo feb e mo san resours.

² Prezerv mo lavi parski mo to serviter lwayal. Protez ek sov to serviter ki finn met so konfians dan twa.

³ Tomem mo Bondie! Pitie mwa, Segner. Mo priye twa lanwit-lizour.

⁴ Donn to serviter lazwa, Segner, parski mo tourn ver twa dan mo lapriyer.

⁵ Segner, to ranpli ar bonte ek pardon; to lamour infini pena born pou dimounn ki kriye twa.

⁶ Ekout mo lapriyer, SEGNER; ekout mwa ki pe sipliye twa.

⁷ Kan maler tom lor mwa, mo kriye twa parski mo kone to reponn mwa.

⁸ Pena lot bondie ki twa, Segner; pena lot ki kapav fer seki to finn fer.

⁹ Tou bann nasion ki to finn kree pou vinn ver twa pou prezant zot respe; zot pou glorifie to nom.

¹⁰ Tomem pli gran e to finn fer bann mervey; Pena lot bondie ki twa, to tousel Bondie.

¹¹ SEGNER, aprann mwa ki bizin fer e mo pou swiv to laverite, montre mwa kouma servi twa ar devouman e mo pou ena gran respe pou to nom.

¹² Mo pou sant to grander ar sinserite, O Segner mo Bondie; mo pou glorifie to nom pou touzour.

¹³ To lamour infini pou mwa li depas tou! To finn tir mwa dan trou lamor.

¹⁴ O Bondie, enn larme vantar pe fons lor mwa; enn bann vwayou pe rod mwa pou touye. Sa bann-la pa pran Bondie kont.

¹⁵ Me twa, Segner, to enn Bondie konpatisan e bienveyan, To ena gran pasians, to ranpli ar lamour infini ek fidelite.

¹⁶ Tourn ver mwa. Ena pitie pou mwa. Donn to serviter to lafors; sov mwa, zanfan to servant.

¹⁷ Montre enn sign ki to kontan mwa; koumsa mo lennmi pou gagn laont ler zot trouv sa, parski twa, SEGNER, to finn sekour mwa, to finn konsol mwa.