Psom 85 - Nouvo Testaman Kreol Morisien Harmonisation NTPS KM

Segner Bondie, beni nou pei

Pou sef koral. Enn Psom ki sorti dan fraternite Kore.

¹ SEGNER, to finn deza montre to zenerozite anver nou later; To finn deza donn Izrael so prosperite;

² To finn deza pardonn pese to pep, to finn efas tou zot bann fot.

³ To finn met dekote to mekontantman e tini to lakoler intans.

⁴ O Bondie nou Sover, fer nou for ankor enn fwa, e aret get nou ar lizie traver!

⁵ Eski to pou touletan mekontan ar nou? Eski to lakoler zame pa pou tengn?

⁶ To pa pou re-donn nou lavi, pou ki to pep retrouv so lazwa an twa?

⁷ Montre nou to lamour infini, O SEGNER, sov nou!

⁸ Mo pe ekout seki LESEGNER Bondie pe dir; li pe promet nou, so pep, lape si nou pa retom dan nou vilin manier.

⁹ Nou kone ki li pou sov bann ki onor li e so laglwar pou touletan la dan nou pei.

¹⁰ Lamour infini ek fidelite pou mars lame dan lame; Drwatir ek lape pou existe kotakot.

¹¹ Lwayote imin pou monte depi later e drwatir Bondie pou desann depi lesiel.

¹² LESEGNER pou donn nou prosperite e nou later so rannman pou extra bon.

¹³ Drwatir pou mars divan LESEGNER pou prepar sime pou li.