Psom 84 - Nouvo Testaman Kreol Morisien Harmonisation NTPS KM

Mo dezir lakaz Bondie

Pou sef koral avek lakonpagnman lor laarp Gat. Enn Psom ki sorti dan fraternite Kore.

¹ SEGNER Toupwisan, komie mo kontan to Tanp merveye!

² Mo pli gran dezir se viv ladan; viv ansam ar twa dan to Tanp, SEGNER. Mo lekor ek mo lespri ki dan lazwa sant ver Bondie vivan.

³ Get kouma mwano finn gagn enn ti plas, ek irondel finn ranz zot nik dan to Tanp pou ki zot ti-baba grandi pre kot twa, SEGNER Toupwisan, mo Lerwa, mo Bondie.

⁴ Bienere bann dimounn ki viv dan to lakaz; ki kontign sant to louanz lanwit-lizour.

⁵ Zot bienere bann ki tir zot lafors dan lasours to lafors; bann ki fite pou fer pelerinaz ziska Montagn Sion.

⁶ Ler zot travers vale Baka ki touletan konn lasesres, dilo koumans sourse partou e premie gro lapli plin bann basin.

⁷ Amizir zot marse, zot lafors grandi, pou prezant devan Bondie ki pli pwisan ki tou lezot segner lor Montagn Sion.

⁸ Ekout mo lapriyer SEGNER Bondie Toupwisan! Ekoute, Bondie ki Zakob ti adore!

⁹ Beni nou lerwa, nou boukliye, beni lerwa ki to finn konsakre.

¹⁰ Enn zourne dan to Tanp li vo plis ki mil zourne dan enn lot landrwa; preferab mo enn portie divan lakaz Bondie ki viv dan lakaz bann move dimounn.

¹¹ Wi, LESEGNER Bondie, li nou lalimier, nou boukliye protekter ki beni nou ar bonte ek loner. Zame li refiz donn nou seki meyer si nou viv enn lavi san repros.

¹² SEGNER Toupwisan, nou leker ranpli ar lazwa parski nou finn met nou konfians an twa.