Psom 83 - Nouvo Testaman Kreol Morisien Harmonisation NTPS KM

Enn lapriyer pou demann detrir lennmi

Enn sante. Enn Psom Asaf.

¹ Bondie, pa res dan silans koumsa, Pa res trankil, san fer nanye, O Bondie!

² Get laba! To lennmi pe azite, e bann ki ena laenn pou twa pe organiz revolt.

³ Zot pe konplote kont to pep; zot pe prepare an sekre kont bann zanfan ki to bien kontan.

⁴ Zot pe dir, “Anou detrir zot kouma enn nasion; anou efas Izrael lor map.”

⁵ Zot tom dakor e zot marye-pike kont twa.

⁶ Bann Edomit, bann Ismaelit, bann Moabit, bann zanfan Agar,

⁷ bann pep Gebal, Amon, Amalek, Filisi ek bann abitan Tir finn fer koalision.

⁸ Bann Asirien, enn alie for bann Amon ek bann Moab, desandan Lot, finn vinn donn enn koudme li osi.

⁹ Tret zot kouma to ti tret bann Madianit, bann Sisera ek bann Zabin kot larivier Kison.

¹⁰ To ti dezarm zot dan Enndor e to ti les zot kadav vinn fimie lor later.

¹¹ Fini zot bann sef kouma to ti fini Oreb ek Zeeb; exterminn zot dirizan kouma to ti exterminn

¹² Zeba ek Zalmouna ki ti dir, “Nou pou akapar later Bondie pou nou.”

¹³ Bondie, fer zot fane kouma lapousier, kouma lapay ki divan sarye.

¹⁴ Parey kouma dife detrir lafore; kouma laflam alim flan montagn

¹⁵ fer zot sove, ale ar to ravaz Tanpet; terifie zot ar to rafal siklonn.

¹⁶ Kouver zot ar laont, O SEGNER ziska zot oblize rekonet to grander.

¹⁷ Fini zot dan imiliasion ek lafreyer pou touletan e fer ki zot mor dan dezoner.

¹⁸ Fer zot realize ki se twa ki SEGNER e zis twa ki Pli Lao lor liniver.