Psom 80 - Nouvo Testaman Kreol Morisien Harmonisation NTPS KM

Segner Bondie, beni nou pei

Pou sef koral, dapre sante lis, enn Alians. Enn Psom Asaf.

¹ Ekout nou, Berze Izrael, twa ki gid bann desandan Zozef kouma enn troupo. Lor to tronn, lao bann seribin, revel twa

² devan bann tribi Efraim, Benzamin ek Manase. Servi to lafors e vinn sov nou.

³ Re-donn nou nou lafors lontan, O Bondie! Fer lalimier to prezans ekler nou pou nou gagn delivrans.

⁴ SEGNER Bondie Toupwisan, komie letan ankor to pou refiz ekout lapriyer to pep?

⁵ To finn met sagrin dan nou lasiet manze e to finn ranpli nou goble ar larm.

⁶ To les nou vinn lasours dispit ar bann nasion vwazin; to pe les nou lennmi insilte nou.

⁷ O Bondie Toupwisan, re-donn nou nou lafors lontan! Fer lalimier to prezans ekler nou pou nou gagn delivrans.

⁸ To ti amenn enn boutir rezin depi Lezip; to ti farous bann lezot tribi pou plant li dan zot later.

⁹ To ti netway enn bout terin pou permet li pouse. So rasinn ti rant dan profonder later e li ti fane partou.

¹⁰ So lonbraz ti tale partou lor kolinn; so bann brans ti depas mem bann gran pie sed.

¹¹ Li ti kontinie peple ziska Mediterane, ale mem ziska larivier Efrat.

¹² Kifer to finn kraz so miray protekter? Aster ninport kisann-la ki pase kapav kokin rezin;

¹³ koson maron vinn fer ravaz ladan, e toutsort zanimo sovaz manz so bourzon.

¹⁴ Get nou kote, O Bondie Toupwisan! Depi lao, get ki pe ariv nou; vinn sov sa lavign la.

¹⁵ Vinn sov to pie rezin ki to ti plante; zenn pie rezin ki zordi finn vinn sitan for gras-a to swin.

¹⁶ Bann lennmi finn met dife ar li, zot finn koup li. Diriz to lakoler kont zot e detrir zot.

¹⁷ Prezerv ek protez lepep ki to finn swazir; nasion ki to finn fortifie pou grandi.

¹⁸ Alor nou pa pou kit twa ankor, re-donn nou lavi e nou pou invok to nom.

¹⁹ Re-donn nou nou lafors lontan, O SEGNER Bondie Toupwisan! Fer lalimier to prezans ekler nou pou nou gagn delivrans.