Psom 8 - Nouvo Testaman Kreol Morisien Harmonisation NTPS KM

Laglwar Bondie e grander limanite

Enn Psom David, pou sef koral, avek lakonpagnman lor laarp Gat.

¹ SEGNER, twa ki nou Segner, To nom li manifik partou lor later! To plas to laglwar pli ot ki lesiel.

² Par labous bann zanfan ek ti-baba to finn batir to lafors kont to bann lennmi, pou ferm labous bann adverser e seki rod lit kont twa.

³ Kan mo admir lesiel, travay ki to lame finn fer, kan mo get avek admirasion lalinn ek zetwal ki to finn met anplas,

⁴ ki valer imin ena pou ki li dan to panse? Ki enn sinp kreatir imin ete, pou to pran li otan kont?

⁵ Pourtan to finn fer li inpe mwins ki Bondie. To finn kouronn li ar laglwar ek loner.

⁶ To fer li gouvern lor travay to lame; to finn fer li siperyer ki lezot kreatir:

⁷ troupo bef ek mouton, e mem bann zanimo sovaz,

⁸ zwazo dan ler, pwason dan dilo, tou seki ale vini dan losean.

⁹ SEGNER, twa ki nou Segner, to nom li bien gran partou lor later!