Psom 79 - Nouvo Testaman Kreol Morisien Harmonisation NTPS KM

Segner Bondie, sov nou pei

Enn Psom Asaf.

¹ Ayo Bondie, bann nasion lennmi finn anvayir to patrimwann; zot finn viol pirte to Tanp sakre e zot finn detrir Zerizalem.

² Zot ti ofer kadav to bann serviter kouma manze pou votour; kadav to bann fidel ti nouri zanimo feros.

³ Zot ti fer disan to pep koule kouma dilo; partou otour Zerizalem, e personn pa ti la pou anter lemor.

⁴ Nou enn size insilt pou bann vwazin, zot mok nou, zot sikann nou.

⁵ O SEGNER, ziska kan? To pou ankoler pou touletan? To lakoler zame li pa pou tengn?

⁶ Diriz to lakoler kont bann tribi ki pa krwar dan twa; bann rwayom ki pa rekonet to nom.

⁷ Pa bliye! Zot ki finn devor to pep, Zakob; zot ki finn detrir so pei.

⁸ Pa pini nou pou pese ki nou anset ti komet; ena konpasion pou nou, nou lespwar finn tom bien ba.

⁹ Ed nou, Bondie, twa ki nou Sover, pou laglwar to nom; liber nou e pardonn nou pou laglwar to nom.

¹⁰ Pa les bann lezot nasion dir, “Kot zot Bondie ete?” Fer bann nasion kone, divan nou lizie, kouma to vanz disan to bann serviter fidel.

¹¹ Ekout bann prizonie kriye-plore; ar to gran lafors liber bann ki dan koulwar lamor.

¹² O Segner, fer to lennmi pey set fwa pli ser bann insilt ek kalomni ki zot ti devers lor twa.

¹³ Lerla, nou, to pep, mouton dan to troupo pou remersie twa eternelman e pou sant to louanz depi isi ziska leternite