Psom 78 - Nouvo Testaman Kreol Morisien Harmonisation NTPS KM

Lesegner Bondie ek so pep

Instriksion Asaf.

¹ Ekoute mo pep, ekout mo lansegnman. Ekout bien seki mo ena pou dir!

² Mo pou servi parabol pou mo koze, mo pou explik bann parol ki ena sekre, ki sorti bien lontan,

³ ki nou finn tande, ki ti kone, ki nou gran-dimounn ti rakont nou.

⁴ Nou pa pou kasiet sa nou bann zanfan; nou pou koz sa ar zenerasion ki pe vini, tou bann mervey LESEGNER, e so pouvwar, e bann aksion extraordiner ki li finn akonpli.

⁵ Li finn donn so instriksion desandan Zakob, li finn etabli lalwa pou lepep Izrael. Li ti dir nou bann anset ansegn so lalwa ar zot bann zanfan

⁶ afin ki konesans la li transmet depi enn zenerasion ziska enn lot zenerasion ki pa finn ankor ne.

⁷ Koumsa nouvo zenerasion pou met zot lespwar dan Bondie, touletan rapel so travay e obeir so komannman.

⁸ Fode pa zot vinn kouma zot gran dimounn lontan ki ti teti ek dezobeisan, parski zot leker pa ti ferm, e zot lwayote ti mins anver Bondie.

⁹ Tribi Efraim, arme ar zarm pwisan, zot sove ler lager eklate.

¹⁰ Zot bliye zot lalians ar Bondie; zot refiz obeir so lalwa.

¹¹ Zot bliye tou seki li finn fer; zot bliye bann mirak ki zot ti trouve ar zot de lizie.

¹² Divan lizie zot bann zanset Bondie ti fer bann gran mirak dan Zoan dan Lezip.

¹³ Li ti ouver enn pasaz dan lamer e fer zot pase; dilo ti diboute lor de kote, kouma de miray.

¹⁴ An plin zour li ti servi enn niaz pou gid zot; aswar li ti servi enn lalimier dife.

¹⁵ Li ti fann ros an de dan dezer e li ti fer dilo sourse depi profonder later.

¹⁶ Enn rwiso ti sorti dan ros e dilo ti koule kouma larivier.

¹⁷ Zot pa ti aret fer pese kont Bondie e dan dezer zot ti revolte kont seki Pli Lao.

¹⁸ Zot ti rod teste so lafors. Zot ti insiste gagn manze pou satisfer zot lanvi.

¹⁹ Zot koz kont Bondie ler zot dir, “Eski Bondie kapav donn nou manze dan dezer?

²⁰ Vremem li ti tir dilo dan ros, me eski li kapav donn nou dipin? Eski li kapav donn nou laviann pou manze?”

²¹ LESEGNER ti amer ler li ti tann zot rabase. So lakoler ti anflame kont Zakob, so lakoler ti monte kont Izrael,

²² parski zot pa ti ena konfians dan li e zot ti nepli krwar ki li pou sov zot.

²³ Pourtan li ti komann niaz lao, li ti ouver laport lesiel

²⁴ pou les lamann tom lor zot, plin zot vant ar lagrin dible ki sorti dan lesiel.

²⁵ Bann imin ti manz nouritir ki anz manze e Bondie ti donn zot tou an abondans.

²⁶ Li ti fer divan Les leve dan lesiel; par so pwisans li ti fer divan Lesid soufle;

²⁷ li ti avoy laviann, osi abondan ki lapousier, e otan zwazo kouma disab lor laplaz,

²⁸ ki ti tom omilie kot zot ti kanpe, partou otour zot lakaz.

²⁹ Tou dimounn ti rasazie ar manze; zot ti satisfe. Bondie ti donn zot seki zot ti oule.

³⁰ Me avan ki zot reisi satisfer zot dezir, manze ti ankor dan zot lagorz,

³¹ lakoler Bondie lev kont zot, li ti touy bann zom pli for, bann meyer zenn Izrael tonbe.

³² Pa krwar sa ti sanz zot! Zot ti kontinie zot pese. Zot ti kontinie pa krwar dan so aksion manifik.

³³ Enn kout soufle, Bondie ti tengn zot lavi e zot lavi ti fini dan lafreyer.

³⁴ Sak fwa li ti touy de-trwa, leres ti vinn ver li; zot ti repanti e zot ti priye Bondie.

³⁵ Lerla zot ti koumans rapel ki Bondie ti zot protekter; ki Bondie Pli Lao ti touletan delivre zot.

³⁶ Zot ti flat Bondie ar zot labous, zot lalang ti koz manti ar li.

³⁷ Zot pa ti lwayal ar Bondie; zot ti fini bliye zot lalians ar li.

³⁸ Me Bondie ti ena konpasion pou so pep; li ti pardonn zot pese e li pa ti avoy lamor lor zot. Plizier fwa li ti tini so lakoler e li ti kontrol so laraz.

³⁹ Li ti rapel zot febles parski zot ti zis bann imin mortel ki ti kouma enn ti labriz ki soufle avan li tengn net.

⁴⁰ Komie fwa dan dezer zot ti met so lotorite odefi; komie fwa zot ti ranpli so leker ar sagrin.

⁴¹ Tanzantan zot ti teste Bondie, zot ti provok Bondie ki Sin, ki Izrael adore.

⁴² Zot ti bliye so gran pwisans, zot bliye zour ki li ti delivre zot depi zot lennmi;

⁴³ e li ti fer so bann aksion etonan dan Zoan dan Lezip.

⁴⁴ Larivier dilo ti vinn larivier disan, akoz sa bann Ezipsien pa ti kapav bwar;

⁴⁵ enn niaz mous ti desann lor zot ar maladi; enn larme krapo ti rann zot lavi bien difisil.

⁴⁶ Sotrel ti detrir plantasion; prodwi zot travay ti fini ar sotrel.

⁴⁷ Lagrel ti touy karo rezin; pie fig sovaz ti griye ar freser.

⁴⁸ Lagrel ti touy zanimo; bann troupo ti viktim lafoud.

⁴⁹ Bondie larg enn koler intans lor bann-la, detres, laraz, ek ostilite, enn gran group anz avek enn mision destriksion.

⁵⁰ Li pa ti kontrol ditou so laraz; li pa ti epargn personn lamor, me li ti les lapes fer so travay destriksion.

⁵¹ Li ti touy premie garson dan sak fami dan Lezip.

⁵² Apre sa, li ti diriz so pep pou sorti laba kouma enn troupo, kouma enn bon berze li gid zot atraver dezer.

⁵³ Li ti amenn zot ver sekirite e zot lafreyer ti disparet. Parkont bann vag lamer ti monte, al kraz lor lennmi lepep.

⁵⁴ Li ti amenn zot dan so domenn sakre, lor montagn ki li ti konkerir.

⁵⁵ Li ti sas bann nasion divan zot, li ti partaz later-la ar bann tribi Izrael sakenn so par, pou konstrir zot lakaz.

⁵⁶ Me zot ti teste Bondie Pli Lao, zot rebel kont li e pa obeir so komannman.

⁵⁷ Zot pran move sime parey kouma zot bann anset. Zot ti parey kouma enn zarm kase ki kapav fer tret.

⁵⁸ Zot ti provok li letan zot servi landrwa sakre bann payin. Zot fer li ankoler letan zot al apre bann idol.

⁵⁹ Bondie ti nepli kapav tini; li ti rezet so pep net.

⁶⁰ Li ti abandonn so tabernak dan Silo ki limem ti swazir pou li kapav viv parmi nou bann imin.

⁶¹ Li ti les lennmi pran kof sign so pwisans, so laglwar e so mazeste ti al an kaptivite.

⁶² Li ti sitan ankoler ki li ti les lennmi touy so pep.

⁶³ Zennzan ti mor dan lager; zennfi pa ti reisi konn sante maryaz.

⁶⁴ Bann pret ti sibir lamor violan e zot vev pa ti mem kapav fer dey.

⁶⁵ Finalman Lesegner leve, kouma kikenn ki sorti dan somey, kouma enn dimounn ki sort dan soulezon.

⁶⁶ Li bat so lennmi ki oblize sove, li imilie zot; zot tom dan laont pou touzour.

⁶⁷ Me li ti rezet desandan Zozef; Li pa ti swazir tribi Efraim.

⁶⁸ Li ti prefer tribi Zide e Montagn Sion ki li ti extra kontan.

⁶⁹ Se dan sa plas la ki li ti konstrir so Tanp parey kouma so lakaz dan lesiel. Anplis li ti fer li telman solid ki li ti pou reziste ravaz letan.

⁷⁰ Answit li ti swazir David kouma so serviter; li ti tir li dan patiraz

⁷¹ kot li ti pe vey so troupo e ti fer li vinn lerwa Izrael, berze lepep Bondie.

⁷² David ti okip zot avek enn leker san repros, e li ti diriz so pep ar boukou talan ek sazes.