Psom 77 - Nouvo Testaman Kreol Morisien Harmonisation NTPS KM

Konsolasion kan lavi pa fasil

Pou sef koral. Dapre Yedoutoun. Enn Psom Asaf.

¹ Mo kriye for, “Bondie ed mwa!” Mo kriye for e Bondie tann mwa.

² Kan lavi pa fasil mo priye e rod sekour Lesegner; tout lanwit mo lev lame lao pou priye; me mo pa gagn rekonfor.

³ Ler mo pans Bondie, mo soupire; ler mo fer meditasion, dekourazman sezi mwa.

⁴ Aswar to pa les mo lizie ferme; traka anpes mwa koze.

⁵ Mo mazinn lepase; souvenir letan lontan.

⁶ Tout lanwit mo reflesi; mo medite e ala seki vinn dan mo latet:

⁷ “Eski Lesegner finn rezet nou pou touletan? Eski zame li pa pou favorab anver nou ankor?

⁸ Eski so lamour infini pou nou finn mor? Eski li finn ramas so promes pou debon?

⁹ Eski Bondie finn aret montre konpasion? Eski so lakoler finn ferm so leker?”

¹⁰ Apre mo dir momem, “Seki fer mwa plis dimal se kikfwa Bondie Pli Lao nepli servi so pouvwar dan nou faver.”

¹¹ Mo pou rapel bann gran explwa LESEGNER; mo pou rapel tou bann mirak to ti fer;

¹² mo pou medit lor tou seki to finn fer; mo pou reflesi lor tou to bann gran explwa.

¹³ Tou seki to fer Bondie, li sin. Eski ena lot bondie osi gran ki nou Bondie?

¹⁴ To tousel Bondie ki fer bann aksion etonan, ki ti montre tou bann tribi to gran pouvwar

¹⁵ ki to ti servi pou sov to pep, desandan Zakob ek Zozef.

¹⁶ Ler lamer ti trouv twa, Bondie, ler lamer trouv twa, li ti krake; profonder losean ti tranble.

¹⁷ Bann niaz ti devers lapli kouma toran partou; loraz ti kraz baraz dan lesiel; zekler kouma fles ti alim partou.

¹⁸ Loraz ti roule ar enn son asourdisan; zekler to avoye ti ekler lemond; later ti gagn sok e li ti tranble.

¹⁹ To fer to sime atraver lamer, to fer enn pasaz atraver profonder lamer, me okenn plas pa ti ena to tras.

²⁰ To ti gid to pep kouma enn troupo atraver Moiz ek Aaron.