Psom 76 - Nouvo Testaman Kreol Morisien Harmonisation NTPS KM

Bondie limem pli gran

Pou sef koral. Pou instriman lakord. Enn Psom Asaf. Enn sante.

¹ Tou dimounn dan Zide konn Bondie; dan Izrael, ena gran respe pou so nom.

² So lakaz li dan Zerizalem; Li viv lor Montagn Sion.

³ Dan so Tanp li detrir zarm ek larsenal so lennmi.

⁴ Get kouma to gran, Bondie, get kouma to inpresionan ler to desann montagn kot to finn konkerir to adverser.

⁵ Bann brav solda lennmi finn perdi tou e aster zot finn rant dan zot dernie somey. Mem pa enn parmi zot pou kapav servi so lafors.

⁶ Ler to ti menas zot O Bondie ki Zakob ti adore, seval ek kavalie ti tom sek.

⁷ Twa, to redoutab, twa. Kisann-la kapav res insansib kan to lakoler exploze?

⁸ Depi dan lesiel to ti pronons to zizman; lemond ti tranble; silans ti konple

⁹ ler, twa Bondie, to ti dibout pou etablir zizman pou ed bann ki ti pe sibir dominasion.

¹⁰ Mem lakoler dimounn pou fer to laglwar pli gran, bann ki sap dan sa lakoler la pou vinn antour twa.

¹¹ Donn LESEGNER to Bondie seki to ti promet li; tou dimounn dan tou nasion ofer li zot ofrand, pou sa Bondie pou ki zot ena lakrint la.

¹² Li fer bann prins vantar bes latet; li terifie bann gran lerwa lor later.