Psom 75 - Nouvo Testaman Kreol Morisien Harmonisation NTPS KM

Bondie, tomem pli gran ziz

Pou sef koral. “Pa amenn destriksion. “Enn Psom Asaf. Enn sante.

¹ Mersi Bondie, mersi! Nou selebre to nom, parski li pros ar nou. Dimounn rakonte touletan bann mirak extraordiner ki to finn fer.

² Bondie dir, “Ler zizman, mwa ki deside. Mo zizman pou baze lor drwatir.

³ Mem si tou kreatir vivan pou tranble, mem si later pou sakouye, Mo pou tini so bann kolonn anplas.

⁴ Mo averti bann fezer, “Aret fer zot fezer.” Mo dir bann move dimounn, “Aret fer vantar.

⁵ Aret fer fanor, e koz ar linsolans!”

⁶ Grander pa sorti dan les ou dan lwes; dan lenor ou dan Lesid.

⁷ Bondie, limem ki ziz; li kondann enn, li relev enn lot.

⁸ LESEGNER tini dan so lame enn koup ranpli ar divin bouyant, bien melanze ar zepis. Li devid li dan lagorz bann move dimounn, fors zot aval tou ziska dernie gout.

⁹ Mwa mo pa pou aret koz lor grander Bondie ki Zakob ti adore; mo pa pou aret sant so louanz.

¹⁰ Li pou detrir pouvwar bann ki pratik lemal e grandi pouvwar bann ki pratik lebien.