Psom 74 - Nouvo Testaman Kreol Morisien Harmonisation NTPS KM

Segner Bondie sov nou pei

Instriksion Asaf.

¹ Ayo Bondie, kifer to abandonn nou pou touletan? Kifer to ankoler kont nou, troupo dan to patiraz?

² Rapel to pep ki tomem to ti swazir lontan, bien lontan. To ti kas zot lasenn lesklavaz pou fer zot vinn to prop posesion. Rapel Montagn Sion kot lontan to ti viv.

³ Vinn get demolision partou; nou lennmi finn kraz tou dan to Tanp.

⁴ Andan to Tanp to lennmi finn kriye laviktwar; zot finn met zot pavion pou fer twa vwar.

⁵ Zot finn netway partou koumadir bisron pe koup pie dan lafore.

⁶ Zot finn defons travay artistik dan pano dibwa ar lars ek teti;

⁷ zot finn kraz tou dan Tanp e zot finn alim dife. Zot finn profann landrwa sakre kot nou priye twa.

⁸ Zot ti anvi fini nou net; zot ti bril tou bann landrwa lapriyer dan nou pei, landrwa sakre kot ti zwenn ar Bondie.

⁹ Bann sinbol sakre finn elimine; inn nepli ena okenn profet. Personn pa kone komie letan sa pou dire.

¹⁰ Pandan komie letan ankor nou bann lennmi pou boufonn twa, nou Bondie? To pou les zot insilte twa eternelman?

¹¹ Kifer to pa oule ed nou? Kifer to gard to lebra krwaze?

¹² Me depi koumansman letan se twa Bondie ki finn nou Lerwa, e ki finn touletan sov nou dan detres.

¹³ Ar to lafors sirnatirel To ti separ lamer pou fer sime; To ti kraz latet bann mons losean;

¹⁴ To ti eklat latet Leviatan, mons malefik, e donn zanimo dezer manz so lekor.

¹⁵ To ti fer dilo sourse e koule dan larivier; To ti fer bann flev profon vinn sek enn kou.

¹⁶ To ti kree lizour ek lanwit; To ti plas soley ek lalinn dan zot plas;

¹⁷ To ti desinn frontier later; To ti fer lete ek liver.

¹⁸ Me pa bliye, SEGNER, ki to lennmi pe boufonn twa; pa bliye zot pena lafwa e ki zot mepriz to nom.

¹⁹ Pa abandonn to kolonb dan grif bann zanimo sovaz, sirtou pa zame bliye to pep ki pe soufer.

²⁰ Pa bliye to lalians ki to ti fer ar nou! Violans ranpli dan tou kwin ek rekwin nwar.

²¹ Pa les bann oprime soufer imiliasion; permet bann dimounn pov e bann ki bizin led loue twa.

²² Bondie, lev twa! Defann to lintere! Pa bliye! Bann ki pena lafwa kritike e boufonn twa gramatin-tanto.

²³ Pa bliye e rapel bien! To lennmi fer enn ta tapaz, to adverser pe touzour kriye mem.