Psom 73 - Nouvo Testaman Kreol Morisien Harmonisation NTPS KM

TRWAZIEM LIV PSOM ( Psom 73—89 ) Lazistis divinn

Enn Psom Asaf.

¹ Vremem Bondie touletan bon ar Izrael e ar bann dimounn ki ena leker kler.

² Me mwa, mo ti manke glise; mo ti pou perdi lekilib ek tonbe,

³ parski mo ti anvi pran plas bann vantar letan mo trouv bann move dimounn pe prospere.

⁴ Zot pa konn douler; zot for, zot bien portan.

⁵ Zot pa soufer kouma nou soufer; zot pa gagn traka kouma lezot.

⁶ Akoz sa zot expoz zot vantardiz koumadir enn bizou; zot violans anpandan lor zot kouma enn manto;

⁷ zot boufi ar lagres, zot lizie sorti gro, e zot latet plin ar plan mesanste.

⁸ Zot sikann dimounn e koz move koze; zot fezer e zot tir plan pou fer dominer.

⁹ Zot labous insilte Bondie dan lesiel e zot lalang kritik tou lor later.

¹⁰ Akoz sa lepep tourn ver zot, ek bwar parol ki zot verse an abondans.

¹¹ Zot dir koumsa, “Kot Bondie pou kone? Eski Pli Lao la konn kiksoz li?”

¹² Ala kouma bann dan lemal ete. Trankil-trankil zot pe ogmant zot rises.

¹³ Savedir pou nanye mo finn res prop. Pou nanye mo finn lav mo lame pou montre mo inosans.

¹⁴ Mo finn soufer tout lazourne; toule gramatin mo konn pinision.

¹⁵ Si mo ti vremem pans koumsa, e azir kouma bann-la mo pa ti pou to serviter fidel, mo ti pou trayir fami Bondie.

¹⁶ Mo ti sey konpran problem-la me pa ti fasil.

¹⁷ Fode mo ti rant dan to Tanp, lerla mo ti konpran ki pou ariv bann ki dan pese.

¹⁸ To met zot lor terin glisan; zot glise, tonbe, destriksion atann zot.

¹⁹ Enn sel kout, fini! Enn gran ravaz! Zot fini bien mal, zot lafin orib.

²⁰ Kouma enn rev ki fonn ar soley gramatin, zot volatilize ler to dres divan zot, O Segner.

²¹ Ler mo ti ena leker dan lapenn, ler mo santiman ti blese,

²² mo ti enn veritab inbesil ki pa ti pe konpran twa, Bondie.

²³ Me mo pou touletan res koste ar twa e mo kone to pou trap mo lame.

²⁴ To pou gid mwa ar bon konsey e alafin to pou akeyir mwa ar boukou loner.

²⁵ Apart twa mo pena personn dan lesiel! Si mo ena twa ki lezot mo bizin lor later?

²⁶ Mo lekor ek mo lespri kapav febli me mo vre lafors se mo Bondie. Apart li, mo trezor eternel, mo pa bizin personn.

²⁷ Bann ki abandonn twa pou fini mal; To pou detrir bann ki fer tret ar twa.

²⁸ Mwa mo kone kouma li bon kan nou pre ar Bondie; Mo finn swazir Lesegner BONDIE pou protez mwa; mo pou proklam tou to bann bienfe.