Psom 72 - Nouvo Testaman Kreol Morisien Harmonisation NTPS KM

Enn lapriyer pou lerwa

Enn Psom Salomon.

¹ Bondie, montre lerwa kouma zize dan drwatir; fer garson rwayal konpran ki to lazistis ete

² pou ki li regne lor lepep dan lazistis e gouvern bann oprime dan ladrwatir.

³ Fer ki bann montagn raport prosperite e bann kolinn amenn lazistis tou dimounn.

⁴ Montre lerwa kouma pas zizman pou ki bann pov pa soufer; edik li pou ki li ed bann feb e anpes explwater fer dominer.

⁵ Ki lerwa viv lontan, zenerasion apre zenerasion, tanki soley briye, tanki lalinn ekler nou aswar.

⁶ Fer lerwa vinn parey kouma lapli ki rafresi later, parey kouma gro lapli ki fer karo vinn fertil.

⁷ Ed li pou ki drwatir fleri pandan so regn e ki ena prosperite tanki lalinn eklere.

⁸ Li pou regn lor enn lamer ziska enn lot, li pou gouvern depi Efrat ziska dernie bout later.

⁹ Bann tribi dan dezer pou rekonet so pouvwar; so lennmi pou depoz zarm dan zot defet.

¹⁰ Lerwa dan Lespagn ek alantour pou montre respe ar bann kado, lerwa Seba ek Saba pou rekonet so lotorite par bann prezan.

¹¹ Tou bann lerwa pou prostern divan li, tou bann tribi pou servi li.

¹² Lerwa donn sekour bann pov ki vinn get li ek bann malere gagn so led.

¹³ Li pitie bann pov ek bann feb; li sap lavi bann ki bizin led.

¹⁴ Li anpes dominer fer bann feb ek pov pas mizer parski pou lerwa tou lavi imin ena valer.

¹⁵ Bondie, donn lerwa enn long lavi! Fer li gagn lor ki sorti Seba; fer ki dimounn fer lapriyer pou li touletan; fer ki benediksion Bondie touletan lor li.

¹⁶ Fer ki so rwayom gagn lakoup rekor; fer ki karo ek vale donn manze an kantite kouma lor bann montagn Liban. Fer ki bann lavil ranpli ar dimounn kouma karo ranpli ar lerb.

¹⁷ Fer ki lerwa so nom res dan nou memwar; fer ki so repitasion dire osi lontan ki lalimier soley. Tou bann pep pou konn benediksion par li, e zot pou deklar li bienere.

¹⁸ Nou tou, anou loue LESEGNER, Bondie Izrael! Li tousel kapav fer mirak extraordiner.

¹⁹ Anou sant so laglwar eternelman! Ki so laglwar ranpli liniver. Amen! Amen!

²⁰ Lafin lapriyer David, garson Zese.