Psom 71 - Nouvo Testaman Kreol Morisien Harmonisation NTPS KM

Lapriyer enn vie dimounn

¹ SEGNER, mo finn vinn ver twa pou gagn to proteksion; pa les mwa zame konn laont.

² Parski tomem ki drwatir ed mwa, sekour mwa. Ekout mo lapriyer e sov mwa.

³ Tomem refiz ek fortres landrwa kot mo touletan kapav vini; to finn desid pou sov mwa, tomem mo proteksion, mo sitadel.

⁴ Bondie, anpes move dimounn fer mwa ditor; anpes kriote ek lemal fer mwa soufer.

⁵ Segner, tomem mo lespwar; depi ki mo zenn, mo konfians li an twa.

⁶ Depi mo nesans mo depann lor twa, twa ki ti tir mwa dan vant mo mama. Touletan mo pou sant to louanz.

⁷ Boukou dimounn finn vey kouma mo viv parski to finn touletan protez mwa.

⁸ Toutlazourne mo loue twa e mo proklam to laglwar.

⁹ Pa rezet mwa aster ki mo finn vinn vie; pa abandonn mwa aster ki mo nepli for.

¹⁰ Mo bann lennmi pe koz kont mwa; bann ki vey mwa pe konplote.

¹¹ Zot dir, “Bondie finn abandonn li; anou lasas li, may li; personn pa pou donn li koudme.”

¹² Bondie, pa res lwin ar mwa. Mo Bondie, vit-vit vinn ed mwa.

¹³ Fer dimounn ki akiz mwa tom dan laont; bann ki rod bles mwa tom dan dezoner ek imiliasion.

¹⁴ Mo pou touletan met mo lespwar dan to pouvwar; mo pou loue twa plizanpli for.

¹⁵ Mo pou rakont to drwatir, tout lazourne mo pou koz lor tou seki to finn fer pou sov nou mem si mo pa bien konpran tou.

¹⁶ Mo pou vinn rakont to bann explwa, Segner BONDIE, e mo pou proklam to lazistis, zis lor twa tousel.

¹⁷ Depi mo zanfan to finn ansegn mwa e malgre mo laz mo kontinie rakont tou to bienfe.

¹⁸ Aster ki mo finn vinn vie, ki mo seve finn vinn blan pa abandonn mwa Bondie. Les mwa proklam to lafors ar zenerasion ki pe vini, e rakont to pwisans ar bann zenerasion fitir.

¹⁹ To drwatir, Bondie, mont lao dan lesiel. To finn fer bann gran mirak; pena to segon, Bondie.

²⁰ Mem si to finn avoy traka ek soufrans lor mwa mo kone to pou re-donn mwa lavi. Mo kone to pou relev mwa, remont mwa depi profonder later.

²¹ To pou ogmant mo loner, e to pou re-konsol mwa.

²² Mo pou sant to louanz ar laarp; mo pou sant to fidelite, mo Bondie. Ar mo sitar mo pou sant to louanz, Bondie ki Sin, ki Izrael adore.

²³ Mo pou kriye mo lazwa ler mo zwe pou twa; avek tou seki mo ete, mo pou sant to grander parski to finn sov mwa.

²⁴ Touletan mo pou koz lor to drwatir parski bann ki ti rod fer mwa ditor finn kouver ar laont ek dezoner.