Psom 7 - Nouvo Testaman Kreol Morisien Harmonisation NTPS KM

Donn nou to lazistis

Enn lamantasion David ki li adres Bondie apropo Kous, enn Binzamit.

¹ SEGNER mo Bondie, mo vinn ver twa pou gagn to proteksion; bann persekiter pe pourswiv mwa; sov mwa, delivre mwa.

² Sinon, kouma lion, zot pou desir-desir mwa, trenn-trenn mwa, e personn pa pou vinn delivre mwa.

³ SEGNER mo Bondie, si mo finn mal azir, si mo lame finn komet enn krim;

⁴ si mo finn trayir enn kamarad; si mo finn fer ditor mo lennmi san rezon;

⁵ alor, les mo lennmi pourswiv mwa e may mwa, les li zet mwa ater, pil lor mwa, e les mo kadav pouri dan lapousier.

⁶ Lev twa, SEGNER, montre to koler! Dres kont violans mo lennmi; Revey twa, twa ki finn etabli drwatir.

⁷ Rasanble bann pep otour twa e depi lor to tronn lao diriz ek ziz zot.

⁸ SEGNER, twa ki ziz lor tou dimounn, ziz mwa dapre mo drwatir, ziz mwa dapre mo lintegrite.

⁹ O Bondie, twa ki lasours drwatir, twa ki konn ziz nou panse ek nou santiman, detrir lemal bann move dimounn e fer bann dimounn ki drwat vinn pli for.

¹⁰ Bondie mo boukliye protekter e li sov seki obeir li.

¹¹ Bondie enn ziz ki fer zistis, enn Bondie ki montre so koler kont lemal toulezour.

¹² Si move dimounn pa repantir Bondie pou fit so lepe e redi difil so lark;

¹³ li finn arm so fles pou li vize, li finn prepar so bann zarm mortel, bann fles anflame.

¹⁴ Gete kouma move dimounn akous lemal; zot met ba dezord e fer lelvaz desepsion.

¹⁵ Zot fouy enn trou, zot fer li bien fon; zot tom pik tet dan trou ki zot finn fouye zotmem.

¹⁶ Zot move lintansion vinn zot prop pwazon; dan zot prop figir, zot zarm malsin eklate.

¹⁷ Mo pou rann gras LESEGNER pou so drwatir. Mo sant grander nom LESEGNER Pli Lao.