Psom 68 - Nouvo Testaman Kreol Morisien Harmonisation NTPS KM

Sante Laviktwar

Pou sef koral. Enn Psom. Enn sante.

¹ Ler Bondie drese so lennmi fane; bann adverser tire, zot sove divan li.

² Kouma lafime voltize dan divan, zot fonn parey; parey kouma lasir fonn dan dife bann infidel disparet dan prezans Bondie.

³ Dimounn drwat dan lazwa; zot selebre zot lazwa dan prezans Bondie, zot ranpli ar boner.

⁴ Sant louanz Bondie; ar bann kantik prepar so larive; pa bliye ki li vwayaz lor enn niaz. So nom: LESEGNER anou selebre nou lazwa divan li.

⁵ Bondie ki viv dan so Tanp sakre li okip orfelin kouma enn papa, e li protez bann vev.

⁶ Bann ki pena personn, li donn zot enn fami; li permet prizonie regagn liberte. Me bann ki dan pese pou touletan zwenn tase dan karo brile.

⁷ Bondie, kan to ti gid to pep to ti mars divan li atraver dezer

⁸ later ti tranble e lesiel ti aroz partou pou anons larive Bondie ki ti aparet lor Sinai, pou prepar lantre triyonfal Bondie Izrael.

⁹ Ler lapli toransiel tonbe later koumans reviv;

¹⁰ to lepep ti konstrir zot vilaz. To bonte zenere ti donn bann pov zot neseser.

¹¹ Lesegner ti donn so instriksion enn lafoul bann fam ti transmet so mesaz:

¹² “Bann lerwa ek zot larme pe sove! Zot pe sove!” Bann fam dan vilaz ti partaz dibien ki finn sezi:

¹³ ti ena kolonb fabrike ar larzan; zot lezel briye ar lor. (Kifer bann kapon ti kasiet dan lekiri olie lager kont lennmi?)

¹⁴ Kan Bondie Toupwisan ti derout bann lerwa lanez ti tom lor Montagn Zalmon.

¹⁵ Get kouma li gran Montagn Basann, enn gran montagn ar so plizier some!

¹⁶ Kifer depi oter sa bann some-la to get ar mepri Montagn Sion kot Bondie finn desid pou konstrir so pale sakre? Samem rezidans LESEGNER pou leternite.

¹⁷ Ar mil milie saryo pwisan, milie lor milie, Lesegner desann depi Sinai ziska landrwa sakre.

¹⁸ To mont dan oter; to ti amenn bann prizonie ar twa; to resevwar don bann dimounn, mem bann ki rebel kont twa, SEGNER Bondie.

¹⁹ Nou loue Lesegner ki sarye nou fardo lanwit-lizour; Limem Bondie ki sov nou.

²⁰ Nou Bondie, li enn Bondie ki donn delivrans; BONDIE Lesegner, ki sap nou dan lamor.

²¹ Bondie pou sirman kraz latet so lennmi; pini bann long seve ki persiste viv dan zot krim.

²² Lesegner finn dir, “Mo pou al sers zot lennmi depi oter Basann; Mo pou al tir zot depi dan profonder losean

²³ pou ki zot lipie tranp dan bann-la zot disan; e mem lalang bann lisien pou gagn zot par.”

²⁴ O Bondie, tou dimounn finn trouv to lamars triyonfal; nou tou temwin laprosesion mo Bondie mo Lerwa ler li rant dan so Tanp.

²⁵ Santer divan, mizisien deryer, bann tifi ki zwe tanbourin omilie:

²⁶ “Remersie Bondie dan gran lasanble. Remersie LESEGNER zot ki zot rasinn dan Izrael.”

²⁷ Dabor Benzamin rantre ar so ti tribi; apre bann dirizan Zide, sakenn ar so group; lerla bann sef Zeboulon ek Naftali.

²⁸ Montre nou to pwisans, Bondie, pouvwar ki to servi pou ed nou.

²⁹ To Tanp dominn Zerizalem laba mem kot bann lerwa depoz kado kot to lipie.

³⁰ Met Lezip dan so plas, zanimo sovaz omilie rozo. Menas sa bann nasion ki parey troupo toro ar zot zenis. Fer zot bes latet e rekonet to grander, e depoz zot bann don larzan. Bann ki nek rod lager, exil zot dan rekwin lwintin.

³¹ Lerla anbasader pou vinn ver twa depi Lezip; bann Etiopien pou lev lame lao pou priye twa.

³² Sant for-for grander Bondie, zot tou, bann diferan pep dan lemond; sant louanz Lesegner.

³³ Limem ki travers lesiel depi koumansman ziska aster. Tann so lavwa pli for ki loraz.

³⁴ Proklam partou grander Bondie; li regne dan Izrael; li ena pouvwar ziska lesiel.

³⁵ Nou tou inpresione ler Bondie sorti andeor so Tanp. Limem Bondie Izrael! Li donn lafors ek pouvwar so pep. Nou loue Bondie!