Psom 65 - Nouvo Testaman Kreol Morisien Harmonisation NTPS KM

Louanz ek remersiman

Pou sef koral. Enn Psom David. Enn sante.

¹ O Bondie, li nou devwar sant to grander dan Sion e pa bliye nou promes

² parski to exos nou lapriyer. Dimounn sorti partou vinn ver twa.

³ Nou bann fot pez lour lor nou, me twa to pardonn tou.

⁴ Bienere seki to finn swazir, seki to finn akeyir dan to sanktier. Nou pou rasazie ar bon kiksoz dan to lakaz, ki nou gagne dan to Tanp sakre.

⁵ Par bann aksion manifik to reponn nou ar delivrans, Bondie nou Sover, tomem lespwar dimounn lor antie later, ziska dimounn lot kote dilo.

⁶ Ar to lafors to plas montagn kot bizin. To deborde ar pwisans.

⁷ To kalme laraz lamer, to apez tapaz vag; to tengn lakoler lepep.

⁸ Bann dan bout later res bet par to travay grandioz. Tou dimounn lor later kriye zot lazwa depi enn kwin ziska lot.

⁹ To montre to lamour pou later e to aroz li. To nouri later, to fer li vinn fertil. Larivier Bondie ranpli ar dilo; to fer later raport manze. Ala kouma to fer sa:

¹⁰ To aroz later laboure ar bon kantite dilo; to aplati bann boul later, to fer later respire pou ki zenn pous kapav pouse.

¹¹ Tout long lane to bonte ranpli nou gardmanze; kot to pase ena labondans.

¹² Patiraz ranpli ar zanimo; flan kolinn ranpli ar lazwa;

¹³ laplenn kouver ar mouton; karo plin ar dible. Partou lanatir sante ar lazwa dan leker.