Psom 64 - Nouvo Testaman Kreol Morisien Harmonisation NTPS KM

Lapriyer pou demann proteksion

Pou sef koral. Enn Psom David.

¹ Bondie! Ekout mo lapriyer! Mo bann lennmi teroriz mwa; sov mwa!

² Protez mwa kont konplo ki move dimounn fer an sekre e kont bann ki fer lemal ki rasanble kont mwa.

³ Zot fit zot lalang kouma razwar e zot langaz blesan li kouma fles ki touye.

⁴ Depi dan kasiet zot tir lor bann inosan, zot tire san averti, san okenn freyer.

⁵ Zot ankouraz zot kamwad pou fer vilin travay; zot bien kalkile kot zot pou kasiet zot lak e zot dir, “Personn pa pou kone.”

⁶ Zot prepar enn move kou e zot dir, “Nou krim li pou parfe!” Difisil pou konpran leker ek lespri dimounn!

⁷ Me Bondie larg so fles lor zot e enn par enn zot tonbe.

⁸ Li pou detrir zot akoz zot koz gra. Bann ki trouv sa pou sakouy latet, pou mok zot.

⁹ Lafreyer pou trap tou par lagorz; zot pou rakont gran travay Bondie e medit lor aksion ki li fer.

¹⁰ Bon dimounn pou dan lazwa LESEGNER. Dimounn drwat pou rod zot refiz kot li e zot pa pou aret sant so louanz.