Psom 63 - Nouvo Testaman Kreol Morisien Harmonisation NTPS KM

Bondie mo konfor ek mo lasirans

Enn Psom David letan li ti dan dezer Zida.

¹ Bondie, tomem mo Bondie, kouma soley leve, mo leker rod twa. Mo dezir to prezans. Mo lekor an-antie ena swaf to prezans; kouma later desese rod dilo.

² Pandan lontan mo finn get twa dan sanktier pou ki mo kapav admir to pouvwar ek to laglwar.

³ To lamour infini ena plis valer ki lavi mem; akoz sa mo pou sant to louanz.

⁴ Tanki mo ena lavi mo pou loue twa; mo lev lame lao pou glorifie to nom.

⁵ Kouma dan enn gran fet avek pli bon repa, mo pou rasazie. Avek lazwa mo sante pou selebre to grander.

⁶ Kan mo pe alonze lor lili mo pa aret pans twa; tout lanwit mo medit lor twa

⁷ parski twa to finn touletan ed mwa. Dan lonbraz to lezel mo sante, ranpli ar lazwa.

⁸ Mo may ar twa ar tou mo leker e to lame pwisan protez mwa.

⁹ Bann ki pe rod mo lamor pou fini dan profonder later.

¹⁰ Zot pou zwenn lamor dan lager e zanimo feros pou devor zot kadav.

¹¹ Lerwa pou trouv so lazwa dan Bondie. Bann ki fer serman dan nom Bondie, zot pou loue li; bann ki kontan koz manti pou oblize ferm labous.