Psom 61 - Nouvo Testaman Kreol Morisien Harmonisation NTPS KM

Lapriyer pou demann proteksion

Pou sef koral. Pou instriman ar lakord. Psom David.

¹ Ekout mwa kriye twa, O Bondie; tann mo lapriyer!

² Depi dan bout later mo kriye twa, mo dekouraze, mo dezespere. Kondir mwa lao, dan enn oter, ki tro ot pou mwa.

³ Tomem mo protekter, enn latour solid kont mo adverser.

⁴ Les mo viv dan to lakaz pou touletan; donn mwa proteksion anba to lezel.

⁵ Bondie, to finn tann promes ki mo finn fer e to finn donn mwa enn par dan benediksion ki to donn bann ki onor twa.

⁶ Azout boukou lane dan lavi nou lerwa; fer ki li viv bien lontan.

⁷ Fer ki so regn dire pandan lontan ankor parski to finn beni li. Ki to fidelite ek to lamour prezerv li.

⁸ Mo pou selebre to louanz touletan, sak zour mo pou onor mo promes.