Psom 60 - Nouvo Testaman Kreol Morisien Harmonisation NTPS KM

Enn lapriyer delivrans

Pou sef koral. Dapre “Lis Temwaniaz”. Enn poem David. Pou instriksion. David ti al konbat bann Arameen Mezopotami e bann ki sorti Soba. Letan Zoab, enn zeneral David, retourne li ti eliminn 12,000 Edomit dan Vale Disel.

¹ Bondie, to finn abandonn nou, e nou finn disloke. To ankoler ar nou; aster-la, relev nou latet.

² To finn fer later tranble e partou vant later finn ouver; nou sipliy twa konble bann fant ek fose parski tou pe grene.

³ To pe fer to pep soufer gran douler; nou pe balote kouma soular ar divin.

⁴ To finn donn bann fidel enn banier kouma enn signal pou ki zot sove divan bann fles ki atake.

⁵ Servi to pouvwar pou sov nou; exos nou lapriyer pou ki pep ki to kontan gagn delivrans.

⁶ Depi so Tanp sakre Bondie ti dir, “Ar mo pouvwar mo pou diviz Sikem e partaz vale Soukot.

⁷ Galaad li pou mwa, Manase osi; Efraim samem mo elmet; Zide li sinbol mo pouvwar rwayal.

⁸ Mo pou servi Moab kouma mo kivet; Mo pou zet mo savat lor Edom pou fer kone mo dibien sa. Mo kriye laviktwar lor bann Filistin.”

⁹ Kisann-la pou amenn mwa dan lavil bien proteze? Kisann-la pou gid mwa lor sime Edom?

¹⁰ Vremem to finn abandonn nou? To pa pou mars ar nou ver laviktwar?

¹¹ Twa, Bondie, ed nou kont nou lennmi! Lafors imin pena gran valer.

¹² Kan Bondie mars ar nou laviktwar li dan nou lame parski li pou kraz nou lennmi.