Psom 6 - Nouvo Testaman Kreol Morisien Harmonisation NTPS KM

Ed mwa Segner Bondie

Pou sef koral. Servi instriman wit lakord. Enn Psom David.

¹ SEGNER, mem to ankoler, pa kondann mwa; malgre to gran koler, pa pini mwa.

² Pitie mwa, SEGNER, parski mo finn deperi net; geri mwa SEGNER parski tou mo lezo pe tranble.

³ Mo lekor ek mo lespri dan tourman, ziska kan, O SEGNER, ziska kan?

⁴ Retourne, SEGNER, vinn sov mwa; akoz to lamour infini vinn sov mo lavi.

⁵ Dan lemond lemor, dimounn pa rapel; ki pou kapav selebre twa laba?

⁶ Soufrans ek lapenn pe fini mwa; touleswar mo dra tranpe e mo lili inonde ar mo larm.

⁷ Mo lizie finn vinn feb telman sagrin finn gonfle li; mo nepli trouv kler telman mo ena adverser.

⁸ Tire ale, zot ki bann trafikan lemal! Mo SEGNER finn tann mo soufrans;

⁹ LESEGNER finn ekout mo siplikasion, LESEGNER finn akeyir mo lapriyer.

¹⁰ Mo lennmi pou zwenn defet ek imiliasion; enn sel kou zot pou rekile, kouver ar laont.