Psom 59 - Nouvo Testaman Kreol Morisien Harmonisation NTPS KM

Bondie, protez nou kont lemal

Pou sef koral. Enn poem David. Lor ler “Pa amenn destriksion. “Letan Sail ti avoy dimounn vey lakaz David pou sey touy li.

¹ Bondie, delivre mwa dan lame mo lennmi; protez mwa kont bann ki atak mwa.

² Delivre mwa kont bann ki pratik lemal; sov mwa dan lame bann asasin.

³ Get zot laba! Zot fite pou touy mwa; dimounn danzere finn konplote kont mwa, san ki mo finn fer okenn pese, SEGNER,

⁴ mo pena okenn tor, me zot prese pou atak mwa. Pa ferm lizie lor mo detres; vinn ed mwa.

⁵ SEGNER Bondie Toupwisan, tomem Bondie Izrael, leve pou to pini bann nasion; pena pitie pou bann tret ki amenn maler.

⁶ Touletanto zot vinn an group; zot irle kouma lisien anraze e zot rode partou dan landrwa.

⁷ Tann zot zoure! Tann zot menase! Zot lalang kouma razwar; zot krwar personn pa tande.

⁸ Me twa, SEGNER, to riy zot; to trouv tou bann nasion ridikil.

⁹ Tomem mo lafors, mo regar tourn ver twa. Tomem mo sitadel, gran Bondie.

¹⁰ Mo Bondie dan so lamour infini pou mars ar mwa; li pou permet mwa trouv defet mo lennmi.

¹¹ Pa touy zot parski sinon mo pep pou bliye vit. Fer zot balote par to pouvwar ek abes zot, Segner nou boukliye.

¹² Sak fwa zot koze, zot labous ranpli ar pese; les zot tom dan latrap zot prop vantardiz. Parski zot zoure, modi, koz manti,

¹³ bril zot ar to lakoler; exterminn zot net. Lerla lemond antie pou konpran ki Bondie gouvern Izrael.

¹⁴ Touletanto mo lennmi retourne, kouma lisien zot zape, zot rode partou dan lavil.

¹⁵ Kouma lisien afame zot rant partou pou kokin manze e ler zot pa gagn ase zot grogne, zot irle.

¹⁶ Mwa mo pou kontinie loue to lafors; toule gramatin mo pou sant to lamour infini bien for. Tomem mo protekter, mo refiz kan difikilte pe rod touf mwa;

¹⁷ Twa ki mo lafors mo pou sant pou twa. Tomem mo Bondie, mo sitadel, ki ena lamour infini pou mwa.