Psom 58 - Nouvo Testaman Kreol Morisien Harmonisation NTPS KM

Bondie ziz move dimounn

Pou sef koral. Enn poem David lor ler “Pa amenn destriksion.”

¹ E zot bann kreatir dan lesiel eski zot zizman li korek? Eski zot ziz dimounn ar zistis?

² Non. Zot lespri ranpli ar lemal e zot responsab violans ek krim dan lemond.

³ Move dimounn lor lapant pese depi dan vant mama; e depi zot nesans zot nek konn koz manti.

⁴ Kouma serpan zot lalang plin ar venin; kouma kobra zot zwe sourd

⁵ pou pa tann lavwa donter serpan, pou pa ipnotize par zot lamizik.

⁶ Bondie, grenn zot ledan, aras ledan bann zenn lion, O SEGNER;

⁷ fer zot disparet kouma dilo dan kanal; kraz zot kouma move lerb dan lale.

⁸ Kouma kourpa, zot disparet dan lagli; kouma mor-ne ki zame trouv soley.

⁹ Avan mem ki dife lapay sof zot marmit, lakoler Bondie pou fer zot anvole kouma lapousier.

¹⁰ Dimounn ki viv drwat pou aplodi ler bann dan pese pe pey ser. Zot lipie pou tranp dan disan bann kriminel.

¹¹ Dimounn pou dir for-for, “Vremem, dimounn ki viv drwat pe gagn rekonpans; vremem, ena enn Bondie ki zize lor later!”