Psom 57 - Nouvo Testaman Kreol Morisien Harmonisation NTPS KM

Bondie Toupwisan vinn ed mwa

Pou sef koral. Lor ler “Pa amenn destriksion. “Enn poem David ler li ti sov Sail, pou kasiet dan kavern.

¹ Pran pitie, Bondie, pran pitie. Mo vinn rod proteksion kot twa. Anba to lezel mo an sekirite ziska ki maler kouma siklonn pase.

² Mo sipliy Bondie Pli Lao, Bondie, ki donn mwa tou.

³ Depi so tronn dan lesiel li pou ekout mwa e li pou sov mwa e bann ki persekit mwa pou kouver ar laont. Bondie pou montre so lamour infini ek so fidelite.

⁴ Kouma lion feros mo lennmi finn antour mwa; mo antoure ar zanimo sovaz; zot ledan fite kouma zarm destriksion; zot lalang fite kouma razwar.

⁵ Bondie, montre to grander ki depas lesiel; montre to laglwar partou lor later.

⁶ Mo lennmi finn instal enn file; dezespwar fer mwa pliye; zot finn met enn piez lor mo sime me gras-a twa zot finn tom ladan zotmem.

⁷ Avek lasirans dan mo leker, Bondie, avek lasirans dan mo leker, mo pou zwe lamizik, mo pou sant to louanz.

⁸ Leve, revey twa, mo leker! Leve sitar ek lagitar! Mo sante pou fer soley leve.

⁹ Mo pou remersie twa, Segner, parmi lepep; mo pou dir to grander parmi bann nasion.

¹⁰ To lamour infini li mont ziska lesiel; to fidelite al ziska bann niaz.

¹¹ Bondie, montre to grander ki depas lesiel; montre to laglwar partou lor later.