Psom 55 - Nouvo Testaman Kreol Morisien Harmonisation NTPS KM

Viktim trayizon

Pou sef koral. Avek bann instriman lakord. Enn poem David.

¹ Bondie, ekout mo lapriyer! Pa tourn ledo ar mo siplikasion!

² Tann mo petision e donn mwa enn repons; mo bann traka pe fini mwa.

³ Mo lennmi pe kriye for kont mwa, bann ki fer lemal pe insilte mwa. Zot vers tourman lor mwa; zot atak mwa ar zot lakoler.

⁴ Mo leker finn sere andan, lafreyer lamor finn tom lor mwa.

⁵ Lafreyer ek tranbleman anvayir mwa, gro frison pe trap mwa.

⁶ Alor mo dir, “Si mo ti ena lezel kouma zwazo mo ti pou anvole pou rod lape dan enn landrwa trankil;

⁷ mo ti pou bat mo lezel pou al kasiet lwin dan dezer.

⁸ Lor vites mo ti pou al rod refiz kot rafal siklonn pa ti pou tous mwa.”

⁹ Segner met konfizion dan langaz mo lennmi, brouy zot; parski mo trouv violans ek konfli dan lavil.

¹⁰ Lanwit kouma lizour zot fer so letour lor so miray; partou dan pei ena violans ek dezord;

¹¹ krim ek masak rant partou; dominer ek koripsion pa kit laplas piblik.

¹² Si enn lennmi ti pe insilte mwa, mo ti pou siporte; si enn rival ti lev kont mwa, mo ti kapav evit li;

¹³ me twa, ki mo egal, ki azir koumsa, mo konpagnon, mo prop kamarad,

¹⁴ nou ki ti partaz lamitie ansam, nou ti al Tanp ansam pou priye Bondie.

¹⁵ Ki lamor tom lor mo bann lennmi par sirpriz; ki zot desann vivan dan trou lamor, akoz zot lakaz ek zot leker plin ar pese ek mesanste.

¹⁶ Mo kriye Bondie osekour, e LESEGNER vinn sov mwa.

¹⁷ Gramatin, midi, aswar mo rakont mo douler ek mo soufrans. Li pa pou fer sourd ar mo lapriyer.

¹⁸ Li liber mwa, mo sin e sof dan mo lalit kont mo lennmi, mem si zot enn lafoul kont mwa.

¹⁹ Bondie, ki lerwa dan leternite, pou tann mwa e li pou imilie mo lennmi parski zot refiz sanze e zot pena respe pou Bondie.

²⁰ Seki yer ti mo kamarad intim finn atak so kamarad, li pa finn konn gard so promes.

²¹ So parol ti dou kouma dimiel me ti ena fiel dan so leker pou lager. So parol ki ti paret kouma lapomad ti an-verite enn kouto ki bien fite.

²² Depoz to fardo lor LESEGNER e li pou rekonfort twa parski zame li abandonn dimounn ki viv drwat.

²³ Twa Bondie, to pou pini asasin ek manter e zot pou rant dan trou lamor kan zot ankor zenn. Mwa, mo finn met mo konfians an twa.