Psom 54 - Nouvo Testaman Kreol Morisien Harmonisation NTPS KM

Bondie protez nou kont nou lennmi

Pou sef koral. Avek instriman lakord. Enn Psom David ler bann Zifit ti al dir Sail, “David pe kasiet parmi nou.”

¹ Bondie, sov mwa par to nom; rann zistis dan mo faver par to pwisans.

² Ekout mo lapriyer, Bondie; tann parol ki mo pe dir.

³ Enn group dimounn insolan pe atak mwa; bann dimounn swaf disan pe vinn pou touye. Zot pa pran Bondie kont ditou.

⁴ Bondie limem mo sekour; LESEGNER limem mo soutien.

⁵ Li pou tourn zot lemal kont zotmem. Dan to fidelite, fini zot.

⁶ SEGNER, avek enn bon leker mo pou ofer sakrifis; mo pou dir twa mersi parski sa li bon.

⁷ Parski li finn delivre mwa dan mo detres. Dan laviktwar mo get defet mo bann lennmi.