Psom 52 - Nouvo Testaman Kreol Morisien Harmonisation NTPS KM

Fer konfians zizman Bondie

Pou sef koral. Instriksion David. Letan Doeg enn Edomit ti vinn dir Sail, “David finn rant dan lakaz Abimelek.”

¹ Kifer to fer vantar, gran misie? Enn zourne to vantar mem lor bann mesanste.

² To tir plan pou fer ditor; to lalang fite kouma razwar. To invant fos koze

³ e li kler to prefer lemal olie lebien; to prefer mansonz plis ki laverite.

⁴ To servi parol pou bles dimounn! To kontan tronp dimounn.

⁵ To pa pou sape ar Bondie; li pou detrir twa pou touletan; li pou tir twa par kole depi to lakaz li pou derasinn twa depi later bann vivan.

⁶ Ler dimounn ki viv drwat trouv sa, zot pou gagn per; apre ki zot pou koumans gagn riye.

⁷ Zot pou dir, “Get li do! Li pa ti pe dir ki li pa bizin proteksion Bondie? Li pa ti pe dir ki se so fortinn ki ti pou sov li? Li pa ti krwar ki so boner li dan mesanste?”

⁸ Me mwa mo kouma enn pie zoliv dan Tanp Bondie; mo finn fer konfians so lamour infini pou leternite.

⁹ Bondie, mo pou touzour dir twa mersi pou tou seki to finn fer; dan lasanble bann fidel mo proklam to grander parski to vreman bon.