Psom 51 - Nouvo Testaman Kreol Morisien Harmonisation NTPS KM

Bondie, pardonn mwa

Pou sef koral. Psom David apre ki profet Natan ti al koz ar li lor so relasion avek Betseba.

¹ Ena pitie pou mwa, Bondie, dan to gran lamour infini. Dan to gran mizerikord efas tou mo pese.

² Lav mwa, retir tou mo bann fot, pirifie mwa, retir mo bann pese.

³ Mo rekonet mo bann tor; mo bann pese touzour divan mo lizie.

⁴ Kont twa, kont to tousel ki mo finn fer pese, e mo finn al fer seki to konsider lemal. To ena rezon trouv mwa koupab santans ki to prononse, li zis.

⁵ Mo finn ne dan pese; depi dan vant mama mo dan pese.

⁶ To kontan laverite dan profon nou leker; ansegn mwa to sazes dan profon mo panse.

⁷ Efas mo pese e mo pou vinn prop; netway mwa e mo pou vinn pli blan ki lanez.

⁸ Fer mwa regagn lazwa ek boner; e ki lezo ki finn kas-kase retrouv zot lazwa.

⁹ Aret get mo bann pese efas tou bann fot dan mwa.

¹⁰ Bondie, kree an mwa enn leker pir ek prop renouvel an mwa enn lespri nouvo ek lwayal.

¹¹ Pa avoy mwa lwin ar twa; pa ras to lespri sin ki dan mwa.

¹² Re-donn mwa lazwa ki enn peser gagne kan to sov li; donn mwa enn lespri obeisans, pou soutenir mwa.

¹³ Alor mo pou ansegn bann peser to bon sime e zot pou retourn ver twa.

¹⁴ Kot ena disan verse, sov mwa, Bondie, Bondie mo liberater, e mo pou dir for-for ki tomem vre drwatir.

¹⁵ Segner, rann mwa laparol pou ki mo kapav sant to louanz.

¹⁶ Mo kone ki to pa pe rod sakrifis; pa mem enn sakrifis zanimo ki nou brile net.

¹⁷ Sakrifis ki Bondie oule, li enn leker brize. Bondie akeyir enn peser leker brize ki finn repanti.

¹⁸ Sion bizin to bonte; ed li e re-konstrir miray Zerizalem.

¹⁹ Apre sa to pou aksepte vre sakrifis, nou ofrand e nou bann sakrifis konple, lerla pou kapav sakrifie bann toro lor lotel dan to Tanp.