Psom 50 - Nouvo Testaman Kreol Morisien Harmonisation NTPS KM

Lapriyer onet ek sinser

¹ LESEGNER, Bondie Toupwisan, ouver so labous pou koze; Li koz ar lemond antie, depi soley leve ziska soley kouse.

² Bondie briye depi Sion, so gran lavil parfe ki bengn dan bote.

³ Nou Bondie pe vini, pa krwar so demars trankil! Divan li enn gran laflam ki devor tou; otour li enn siklonn violan pe balie tou.

⁴ Li ordonn later ek lesiel vinn dibout temwin pou get kouma li ziz so pep.

⁵ Li dir, “Rasanble mo pep fidel; rasanble bann ki finn fer enn lalians ar mwa atraver ofrand ek sakrifis.”

⁶ Liniver pe proklame ki Bondie Li bon ek zis e limem pli gran ziz.

⁷ “Mo pep, ouver zorey parski Mo ena zafer inportan pou dir zot; Mo pou denons Izrael! Mwa ki Bondie, zot Bondie,

⁸ Mo pa pe kritik zot akoz zot sakrifis oubien akoz zot ofrand ki devan mwa toulezour.

⁹ Pa krwar mo bizin gro-gro toro ouswa bouk bien-bien gra.

¹⁰ Pa bliye ki tou zanimo dan karo, dan patiraz ouswa dan lafore zot tou pou mwa;

¹¹ zanimo dan lezer kouma lor later zot tou pou mwa.

¹² Ler mo fin mo pa bizin zot manze. Tou seki ena dan lemond zot pou mwa!

¹³ Zot krwar mwa mo bizin laviann toro ouswa disan kabri?

¹⁴ Ofer Bondie enn sakrifis aksiondegras. Onor zot promes ki zot finn fer ar Bondie Toupwisan.

¹⁵ Kan zot dan dife, apel mwa e mo pou vinn sov zot. Lerla zot sant mo louanz.”

¹⁶ Lerla Bondie koz ar bann move dimounn, “Ki serti zot resit mo instriksion? Ki serti zot koz lor mo lalians?

¹⁷ Kan zot refiz mo konsey; e zot rezet mo parol.

¹⁸ Kan zot zwenn voler, zot fer kamarad ar li; zot frekant dimounn ki komet adilter.

¹⁹ Zot parol pese koule fasilman; zot koz boukou manti.

²⁰ Zot dir foste lor zot prop frer; zot trenn garson zot mama dan labou.

²¹ Ler zot ti fer tousala mo pa ti dir nanye. Akoz sa zot ti krwar mo parey kouma zot. Aster mo pou akiz zot, e zot pou konn laverite.

²² Ekout mwa bien, bann ki bliye Bondie, sinon mo desir zot an morso. Pa krwar ki pou ena kikenn pou tir zot dan dife!

²³ Mo bizin zis zot rekonesans. Sel sakrifis ki ena valer pou mwa. Obeir mwa e mo pou sov zot.”