Psom 5 - Nouvo Testaman Kreol Morisien Harmonisation NTPS KM

Segner, donn mwa to proteksion

Pou sef koral, pou akonpagnman ar laflit. Enn Psom David.

¹ SEGNER, ekout mo lapriyer, e tann mo douler kriye.

² Twa mo Bondie, mo Lerwa, ekout mwa kan mo kriye twa, se twa ki mo priye.

³ SEGNER, boner gramatin to tann mo lavwa; kouma soley leve mo prepar tou pou twa e lerla mo atann.

⁴ To pa enn Bondie ki pran plezir dan lemal; seki fer lemal pena plas kot twa.

⁵ Bann vantar pa pou tini dibout divan twa; to deteste move dimounn.

⁶ To detrir bann manter, SEGNER, to ayir bann kriminel ek bann voler.

⁷ Akoz labondans to gran lamour infini mo pou kapav rant dan to lakaz, bes mo latet dan direksion to Tanp sakre, e avek gran respe mo pou azenou.

⁸ SEGNER, twa ki zis, gid mwa, ena boukou ki pe kasiet pou atak mwa. Tir tou bann obstak ki ena lor sime tonn montre mwa pou swiv.

⁹ Pa kapav fer konfians seki sorti dan labous mo lennmi; zot lespri ranpli ar destriksion; zot lagorz kouma tonbo ouver; zot lalang servi pou tronp dimounn.

¹⁰ Bondie, deklar zot koupab; fer ki zot prop konplo devir zot anba-lao; pous zot andeor to prezans akoz zot bann pese parski zot finn revolte kont twa.

¹¹ Me tou ki konfie zot ar twa pou gagn to proteksion; zame zot pou fini sante ar sa lazwa la; protez bann ki kontan to nom, akoz twa zot kriye ar lazwa.

¹² Wi, twa, SEGNER, to beni bann ki obeir twa, to gran lamour anvlop zot e protez zot parey kouma enn boukliye.