Psom 49 - Nouvo Testaman Kreol Morisien Harmonisation NTPS KM

Pa met ou lafwa dan larises

Pou sef koral. Enn Psom ki sorti dan fraternite Kore.

¹ Ekout sa tou dimounn! Ouver zorey zot tou, abitan later!

² Ki ou gran, ki ou piti; ki ou ris, ki ou pov.

³ Mo pou dir zot klerman parol lour ar sazes; anplis, mo leker pou exprim bann konesans profon.

⁴ Mo pou bien ekout proverb, mo pou devwal explikasion zedmo ar sitar.

⁵ Kifer mo bizin trakase letan traka leve, ler mo lennmi antour mwa,

⁶ sa bann ki fer konfians zot trezor, e fer fezer parski zot ris?

⁷ Personn pa kapav pey ase pou sov lavi enn lot; pena pri ki kapav donn Bondie kouma ranson pou lavi,

⁸ lavi, ofet, li pena pri, personn pa kapav peye pou sov so lavi;

⁹ personn pena ase kas pou evit lamor, oubien evit trou lamor.

¹⁰ Get bann saz. Lamor pa kit zot. Mem zafer pou so inbesil kouma so idio. Oblize kit fortinn deryer.

¹¹ Se zot tom ki vinn zot lakaz permanan; se laba ki zot pou pas leres letan malgre kan zot ti vivan zot ti ena terin par arpan.

¹² Grander, fortinn, pa anpes dimounn zwenn lamor. Kouma ninport ki zanimo, kan nou ler vini bizin ale.

¹³ Get ki ariv bann fezer ki krwar dan zot prop lafors! E ki trouv plezir dan zot prop diskour.

¹⁴ Zot al ver lamor kouma mouton. Lamor pou diriz zot kouma zot berze. Bann vantar koumsa desann dan trou lamor lor vites e laba zimaz ki zot ti ena li disparet, lemond lamor ki vinn zot lakaz.

¹⁵ Me mo Bondie pou sov mwa dan pouvwar lamor, wi, li pou delivre mwa pou limem.

¹⁶ Kan enn dimounn vinn ris, kan fortinn so fami grosi, pa les sa fatig ou latet.

¹⁷ Kan li mor li pou oblize les so trezor par deryer li pa pou sarye so fortinn ar li letan li ale.

¹⁸ Mem si dan sa lavi-la enn dimounn ziz limem ere, apre tou, dimounn felisit twa kan to prospere,

¹⁹ li oblize al rezwenn so bann anset ki pa pou trouv lalimier ankor.

²⁰ Grander, fortinn, pa anpes dimounn zwenn lamor. Kouma ninport ki zanimo, kan nou ler vini bizin ale.