Psom 48 - Nouvo Testaman Kreol Morisien Harmonisation NTPS KM

Laglwar e lafors Sion

Enn kantik. Enn Psom ki sorti dan fraternite Kore.

¹ LESEGNER li gran, e li merit louanz dan lavil nou Bondie, lor montagn sakre.

² Li bien ot e inpresionan, li donn lazwa dan lemond antie, montagn Sion, dan extrem Nor, lavil gran lerwa.

³ Bondie parmi bann sitadel dan lavil finn montre limem enn sekirite garanti.

⁴ Bann sef tribi ansam ar zot larme fer lalians pou atak montagn Sion

⁵ me ler zot trouv li dres divan zot, zot sezi, zot panike, zot sove-ale.

⁶ Lerla tranbleman trap zot, enn douler kouma madam ki pe gagn ti-baba;

⁷ parey kouma pirog balote dan siklonn.

⁸ Nou finn deza tande aster nou finn trouve ar nou de lizie, dan lavil LESEGNER Toupwisan, dan lavil nou Bondie, ki li finn etabli pou touzour.

⁹ Andan to Tanp, Bondie, nou medit lor to lamour infini.

¹⁰ Nou tann to louanz, parey kouma to nom, partou lor later. To lotorite ranpli ar zistis.

¹¹ Montagn Sion viv dan lazwa; bann vilaz dan Zide konn enn gran boner akoz to bann zizman.

¹² Fer letour Zerizalem kont so bann tour,

¹³ admir so ranpar, mars atraver so sitadel, pou zot kapav rakont zot zanfan ek ti zanfan.

¹⁴ Bondie, li nou Bondie pou touletan, li pou gid nou pou touzour.