Psom 47 - Nouvo Testaman Kreol Morisien Harmonisation NTPS KM

Lesegner Bondie Toupwisan

Pou sef koral. Enn Psom ki sorti dan fraternite Kore.

¹ Tou dimounn lemond antie tap lame for-for! For-for anou sant louanz Bondie avek lazwa!

² LESEGNER, Bondie Pli Lao li redoutab li enn gran lerwa lor later antie.

³ Li soumet bann pep anba nou pouvwar, li met bann nasion anba nou kontrol.

⁴ Li finn swazir enn patrimwann pou nou, parski li kontan nou, fierte Zakob.

⁵ Bondie monte parmi aklamasion, LESEGNER monte ar son tronpet.

⁶ Sant louanz Bondie, sante! Sant louanz nou lerwa, sante!

⁷ Bondie lerwa antie later; sant enn psom pou loue li.

⁸ Bondie regn lor tou bann nasion; li asiz lor so tronn sakre.

⁹ Tou bann dirizan lezot nasion rasanble avek lepep Bondie ki Abraam ti priye. Tou pouvwar lor later pou Bondie limem ki pli lao ki tou.