Psom 45 - Nouvo Testaman Kreol Morisien Harmonisation NTPS KM

Sante pou maryaz rwayal

Pou sef koral, dapre sante lis. Instriksion ki sorti dan fraternite Kore. Enn sante damour.

¹ Mo leker deborde ar zoli parol ler mo konpoz sa poem-la pou mo lerwa. Parol poetik koule kouma lank dan plim enn ekrivin ki konn so metie.

² Parmi tou bann zom, ala ou gayar Segner! Ou stil koze ena elegans. Alor Bondie finn touletan beni ou.

³ O lerwa pwisan, met lepe dan sintir e montre ou grander ek ou pouvwar.

⁴ Kouma enn gran lerwa, mars ver laviktwar pou defann laverite, limilite e lazistis. Ou pwisans pou demontre bann gran aksion.

⁵ Ou fles pwint transpers leker ou lennmi; bann tribi tom dan ou lipie.

⁶ Rwayom ki Bondie finn donn ou li pou regne pou touletan. Ou diriz ou pep dan lazistis;

⁷ ou kontan lazistis; ou deteste seki move. Akoz sa Bondie, ou Bondie, finn swazir ou, e finn aroz lor ou latet delwil benediksion, lonksion ki okenn lezot lerwa pa finn resevwar.

⁸ Ou linz parfime ar parfin rar, lalwes e kanel; bann artis diverti ou dan sato dekore ar lor ek ivwar.

⁹ Bann fidoner ki dan lakour rwayal zot bann prinses renome; adrwat ou tronn ou bieneme pe diboute; so linz ek so bizou garni ar meyer lor ki existe.

¹⁰ Nouvel marye, ekout mwa bien! Bliye ou nasion ek ou fami.

¹¹ Lerwa atire par ou bote; akoz li ou segner, rann li loner e obeir li.

¹² Lepep Tir pou donn ou boukou kado; bann ki ena fortinn pou fer tou pou fer ou plezir.

¹³ Laprinses dan sato! Get kouma li zoli! So manto brode ar difil lor.

¹⁴ Bann fidoner finn akonpagn li, amenn li kot lerwa; so manto manifik li kouler larkansiel.

¹⁵ Lazwa ek boner akonpagn prosesion rwayal.

¹⁶ O segner lerwa, ou bann garson pou kontinie ou regn; ou pou fer zot vinn bann prins lor antie later.

¹⁷ Mo sante pou fer ou nom seleb zenerasion apre zenerasion, ziska lafin letan tou bann pep pou sant ou laglwar.