Psom 44 - Nouvo Testaman Kreol Morisien Harmonisation NTPS KM

Enn lapriyer pou proteksion

Pou sef koral. Instriksion ki sorti dan fraternite Kore.

¹ Ar nou prop zorey nou finn tande, Bondie, nou gran-dimounn finn rakont bann gran mirak ki to ti fer dan zot lepok, letan lontan:

² ki manier to ti depouy bann nasion ki swiv idol pou donn to pep zot later; ki manier to ti pini bann pep infidel pou fer pep ki ti swiv twa epanouir.

³ Pa kapav dir ki to pep ti gagn pei ar lafors zot lepe; zot pa ti gagne akoz zot larme ti for. Zot ti gagne gras-a to pwisans ek to lafors; zot ti gagne par lalimier to prezans, parski to kontan zot.

⁴ Tomem mo lerwa e mo Bondie; se twa ki donn laviktwar to pep;

⁵ gras-a twa nou lennmi gagn defet; gras-a twa nou kraz nou adverser.

⁶ Mo pa fer konfians mo zarm; pa mo lepe ki pou donn mwa laviktwar.

⁷ Me to kraz nou lennmi; to kouver nou adverser ar laont.

⁸ Akoz sa nou pou sant to louanz e nou touzour pou dir twa mersi.

⁹ Pourtan to finn rezet nou ek imilie nou; to nepli mars ar nou bann larme.

¹⁰ To les bann-la bat nou; to les nou lennmi depouy nou.

¹¹ To les nou kouma mouton dan labatwar; to les zot dispers nou lwin, parmi lezot nasion.

¹² To finn vann nou pou dipin-diber, koumadir nou pa vo nanye.

¹³ Nou enn size insilt parmi lezot nasion. Ala zot sikane! Ala zot riye!

¹⁴ Partou nou enn size ki fer riye; nou lennmi boufonn nou, mepriz nou.

¹⁵ Lanwit-lizour mo maler li divan mwa, ek laont kouver mo fron

¹⁶ letan mo tann insilt e blasfem parski bann lennmi pe rod tir vanzans.

¹⁷ Tousala finn ariv nou. Pourtan nou pa finn bliye twa! Pourtan nou pa finn kas lalians ki existe ant twa ek nou!

¹⁸ Nou leker pa finn bliye twa, nou pa finn kit larout ki to finn trase.

¹⁹ To finn kraz nou dan dezer, pei zanimo sovaz; to abandonn nou dan marenwar.

²⁰ Si koumadir nou ti bliye nou Bondie e priye enn bondie etranze

²¹ to ti pou may nou anplin parski to konn nou panse profon.

²² Akoz nou lamour pou twa, pe trenn nou kouma mouton, pe amenn nou labatwar.

²³ Ayo Segner, leve! Kifer to pe dormi? Leve! Pa abandonn nou!

²⁴ Pa zwe kasiet ar nou! Pran kont nou soufrans ek nou douler!

²⁵ Nou finn tom an gran dan lapousier; nou pe ranpe dan later.

²⁶ Lev twa, vinn ed nou! Sov nou akoz to lamour infini.