Psom 42 - Nouvo Testaman Kreol Morisien Harmonisation NTPS KM

DEZIEM LIV PSOM ( Psom 42—72 ) Lapriyer enn dimounn an-exil

Pou sef koral. Instriksion ki sorti dan fraternite Kore.

¹ Parey kouma serf rod dilo kler larivier, mwa mo rod to prezans, mo Bondie.

² Mo swaf pou Bondie, Bondie vivan. Kan mo pou kapav rant dan to lakaz pou prezant mwa devan twa, pou ador twa?

³ Lanwit-lizour mo plore; zis larm ki plin mo vant. Letansa mo bann lennmi persiste dir, “Kot to Bondie ete?”

⁴ Mo leker segne ler mo rapel lepase kan ansam dan lafoul nou ti al ver lakaz Bondie; kan mo ti pe gid laprosesion lor bon sime. Nou ti telman ere letan nou ti pe sant for-for nou rekonesans ek nou lazwa!

⁵ Kifer mo tris koumsa? Kifer traka touf mwa? Mo bizin met mo lesperans dan Bondie parski mo pou loue li ankor, mo Protekter e mo Sover.

⁶ La kot mo ete an-exil, mo leker soufer alor mo re-pans twa,

⁷ la kot kouran, vag ek kaskad dilo depi Montagn Ermon ek Mizar devers dan Larivier Zourdin e vir-vir mwa anba-lao.

⁸ Lizour LESEGNER donn mwa so lamour infini touletan pou ki aswar mo kapav sant louanz mo Bondie e priye li, limem mo lavi.

⁹ Mo dir Bondie, mo protekter, “Kifer to finn abandonn mwa? Kifer mo bizin kontinie soufer persekision mo lennmi?”

¹⁰ Mo soufer ziska mo lezo fermal, kan bann adverser insilte mwa, kan zot persiste dir, “Kot to Bondie ete?”

¹¹ Kifer mo tris koumsa? Kifer traka touf mwa? Mo bizin met mo lesperans dan Bondie parski mo pou loue li ankor, mo Sover e mo Bondie.